Byltyr 1,1 mlrd teńgege úı salǵan ákimdik bıyl týra sondaı úıge úsh ese kóp aqsha jumsamaq boldy

PAVLODAR. KAZINFORM — Pavlodarda antıkordyń aralasýymen salynyp jatqan kópqabatty eki úıdiń quny 3,7 mlrd teńgeden 2 mlrd teńge deıin tómendetildi. Buǵan dál osyndaı baspananyń byltyr ǵana 1,1 mlrd teńgege salynǵany negiz bolǵan.

Bul týraly QR Sybaılas jemqorlyqqa qarsy is-qımyl agenttiginiń baspasóz qyzmeti habarlady.

Agenttik quzyret sheńberinde satyp alynatyn taýarlardyń, jumystar men kórsetiletin qyzmetterdiń josparly baǵalaryn kóterý turǵysynan memlekettik satyp alý men kvazımemlekettik sektordyń satyp alýyna monıtorıng jasaıdy. 

«Pavlodar oblysynda Aqsý qalasy qurylys bólimi jalpy somasy 3,7 mlrd teńgege 9 qabatty kóppáterli eki turǵyn úı salýdy josparlady. Bul rette 2023 jylǵy qarasha aıynda uqsas qurylym 1,1 mlrd teńgege turǵyzyldy. Baǵany qaıta qaraý nátıjesi boıynsha qurylystyń jalpy quny 2 mlrd teńgege deıin tómendetildi. Osylaısha qurylys qunynyń 1,7 mlrd teńgege qymbattaýyna jol berilmedi», -dep málimdedi antıkor qyzmetinen.

Turaqty monıtorıng nátıjesinde respýblıka boıynsha jalpy somasy 30 mlrd teńgege baǵanyń negizsiz kóterilýine jol berilmedi.

Joba bastalǵannan beri (2020 jyldan) shamamen 171 mlrd teńge bıýdjet qarajaty únemdelgen.