Billie Jean King Cup: Kanadalyqtar Anna Danılına men ıÝlııa Pýtıntsevany negizgi qaýip sanaıdy
ASTANA. KAZINFORM — Elordada 10-11 sáýir kúnderi áıelder arasyndaǵy komandalyq álem chempıonaty — Bıllı Djın Kıng kýbogynyń irikteý kezeńi ótedi.
Qazaqstan men Kanada quramalarynyń kezdesýi qarsańynda ótken baspasóz máslıhatynda qos taraptyń kapıtandary daıyndyq barysyn pysyqtady.
Kanada quramasy Astanaǵa birneshe oıynshysyz keldi. Atap aıtqanda álemniń 9-raketkasy Vıktorııa Mboko, 25-oryndaǵy Leıla Fernandes jáne juptyq synda úzdik altylyqqa kiretin Gabrıela Dabrovskı bul matchqa qatyspaıdy. Olardyń ornyna Bıanka Andreeský bastaǵan jas oıynshylar el namysyn qorǵamaq.
Kanada quramasynyń kapıtany Marı-Eva Pellete negizgi oıynshylardyń joqtyǵyn jaraqat alýymen túsindirdi.
— Ókinishke qaraı komandamyzdaǵy birneshe oıynshy jaraqat alyp qaldy, sondyqtan olar bul aptada bizben birge bola almaıdy. Ekinshi másele — kestesi tyǵyz. Soǵan qaramastan, biz myqty komanda jınaı aldyq jáne barymyzdy salýǵa daıynbyz. Qazaqstan quramasyn qurmetteımiz, olardyń kóp oıynshylarymen jaqsy tanyspyz. Ońaı bolmaıtynyn bilemiz, biraq ár upaı úshin aıaǵyna deıin kúresýge bekinip otyrmyz, — dedi Marı-Eva Pellete.
Qazaqstan quramasynyń kapıtany ıÝrıı Şýkın de qarsylastyń quramyna qaramastan, bosańsýǵa bolmaıtynyn atap ótti. Onyń aıtýynsha, qazaqstandyq tennısshiler úshin qazirgi basty mindet — hardtan grýntqa (topyraq korty) sátti aýysý.
— Qarsylas quramynda úzdikterdiń bolmaýy bizge jeńildik beredi dep aıta almaımyn. Komandalyq jarystarda oıynshydan ne kútetinińdi eshqashan bilmeısiń. Sondyqtan biz joǵary deńgeıde daıyndalyp jatyrmyz. Sonymen qatar Elena Rybakınanyń qazir álemdegi birinshi raketka bolýǵa zor múmkindigi bar. Mundaı sátte onyń jeke reıtıngine basymdyq berýi — Federatsııamen birlesip qabyldanǵan ortaq sheshim, — dedi ıÝrıı Şýkın.
Sondaı-aq, Kanada kapıtany Qazaqstan quramyndaǵy ıÝlııa Pýtıntseva men Anna Danılınanyń qaýipti ekenin erekshe atap ótti. Reıtıng boıynsha qazaqstandyqtar joǵary turǵandyqtan, Marı-Eva Pellete óz komandasyn bul joly «aýtsaıder» retinde kóretinin jasyrmady.
— Men olardyń oıynyn baqyladym. Danılına da, Pýtıntseva da — ekeýi de biz úshin óte qaýipti. Biz qazir aýtsaıder sanalsaq ta, bul jas oıynshylarymyz úshin bolashaqqa úlken tájirıbe jınaýǵa taptyrmas múmkindik, — dep túıindedi Marı-Eva Pellete.
Aıta keteıik, áıelder tennısi qaýymdastyǵy (WTA) jekeleı jáne juptyq synda jańartylǵan reıtıngisin jarııalaǵan bolatyn.
Jekeleı synda TOP-10-da eshqandaı ózgeris bolǵan joq. Qazaqstannyń birinshi raketkasy Elena Rybakına 2-orynda qaldy.
Al ótken aptada Úndistandaǵy ITF W15 týrnırinde jartylaı fınalǵa deıin jetken Jibek Qulambaeva 422-den 406-ǵa kóterildi.
