Bıllı Djo Sonderstiń jankúıerleri Golovkınge beıneúndeý joldady
ASTANA. QazAqparat - Irlandııalyq boks jankúıerleri qazaqstandyq bylǵary qolǵap sheberi Gennadıı Golovkınge (37-0, 33 KO) beıneúndeý joldady, dep jazady Sports.kz.
«Gennadıı „GGG" Golovkın, seni qurmetteımiz. Biz Bıllı Djo Sonderstiń jankúıerlerimiz. Sen kez kelgenimen jekpe-jekke shyǵýǵa daıynmyn deısiń ǵoı, endeshe óz menedjerlerińe aıt, kelisimge qol qoısyn! Eger qalam tappaı júrse, mine (qalamdy kórsetedi)! Biz seniń myqty jigit ekenińdi bilemiz. Seniń boksyńdy súıip kóremiz, Sonderstiń de boksyn janymyz súıedi. Olaı bolsa, jankúıerlerdiń qalaǵanyn nege jasamaısyńdar? Eger sen bul beldikti (WBO) alǵyń kelse, jeńip al!» - deıdi jankúıerler vıdeoúndeýinde.
Buǵan deıin buqaralyq aqparat quraldary betinde Golovkın men Bıllı Djo Sonderstiń (24-0, 12 KO) kezdesýi maýsym aıynda Astanada ótedi degen aqparat taraǵan edi. Alaıda Yahoo! Sports-tyń málimetinshe, olardyń kezdesýi bolmaıdy: GGG meksıkalyq Saýl Alvarespen (48-1-1, 34 KO) qyrkúıekte kezdesýge daıyndalyp jatyr.
