Bıllı Djın Kıng kýbogy: ıÝlııa Pýtıntseva jarysty jeńispen bastady
ASTANA. KAZINFORM — Astanada Billie Jean King Cup týrnıriniń irikteý kezeńi bastaldy. Búgin kortqa Qazaqstannyń ekinshi raketkasy, álemniń 74-ornyndaǵy ıÝlııa Pýtıntseva men reıtıngte 198-satyda turǵan Kaıla Kross shyqty.
Alǵashqy alty geımde qos qarsylas ózderine senimdi boldy. Alaıda jetinshi geımde qazaqstandyq tennısshi breık-poıntty sátti paıdalanyp, esepti 4:3-ke jetkizdi. Budan keıin ol taǵy eki geımdi qatarynan jeńip, alǵashqy sette basymdyqty nyǵaıtty. Osylaısha, partııa nebári 29 mınýtta 6:3 esebimen aıaqtaldy.
Ekinshi sette 21 jastaǵy kanadalyq tennısshi oıyn yrǵaǵyna birtindep beıimdeldi. Úshinshi geımde tartys kúsheıip, esep birneshe ret teńesti. Degenmen, ıÝlııa Pýtıntseva 5:1 esebimen alǵa shyqqan sátte matchty dop berý kezinde aıaqtaı almaı qaldy.
Osydan keıin oıyn barysy ózgerdi. Kanadalyq qarsylas qatarynan tórt geımdi jeńip, esepti 5:5-ke deıin teńestirdi. Al birneshe matchbol múmkindigin paıdalana almaǵan ıÝlııaǵa kezdesýdi jeńispen aıaqtaý úshin bar kúshin salýǵa týra keldi.
Kezdesý Qazaqstan quramasy kóshbasshysynyń paıdasyna 6:3, 7:5 esebimen aıaqtaldy. Al jalpy esepte Qazaqstan quramasy 1:0 esebimen alǵa shyqty.
Kelesi kezekte kortqa 19 jastaǵy Sonıa Jıenbaeva (1023) men kanadalyq Bıanka Andreeský (130) shyǵady.
Aıta keteıik, Qazaqstan – Kanada kezdesýiniń jeńimpazy 22–27 qyrkúıek aralyǵynda Qytaıda ótetin Bıllı Djın Kıng kýbogynyń fınaldyq kezeńine joldama alady.
Eske sala keteıik, tennısshi Zarına Dııas kásibı mansabyn aıaqtady.
