Bıllı Djın Kıng kýbogy: Qazaqstan quramasy Aýstralııany utty

ASTANA. KAZINFORM — Aýstralııanyń Brısben qalasynda Bıllı Djın Kıng kýbogynyń irikteý týrnırinde Qazaqstan quramasy kort ıelerimen ekinshi kezdesýin ótkizdi.

Bul joly Qazaqstannyń birinshi, álemniń 10-raketkasy Elena Rybakına dúnıejúzilik reıtıngide 61-orynda turǵan Kımberlı Bırrellmen sheberlik baıqasty.

Birinshi partııada aýstralııalyq sportshy breık jasap, 3:1 esebimen alǵa shyqty. Biraq osydan keıin Rybakına qatarynan bes geımdi aldy – 6:3.

Ekinshi setti de sátti bastaǵan Bırrel 5:1 esebimen alǵa ketti. Degenmen Elena tabandylyq tanytyp, tarazy basyn teńestirdi – 5:5. Sodan keıin taı-breıkte jeńisti julyp aldy – 7:6 (7:4).

Saǵat jarymǵa jýyq ýaqytqa sozylǵan báseke barysynda Rybakına 7 eıspen birge 8 breık-poınttyń teń jartysyn múlt jibermedi. Bırrell 2 eıs, 3 breıkpen (6 breık-poınt) kózge tústi.

- Básekeni ıÝlııa Pýtıntseva sátti bastap berdi. Jankúıerlerdiń qoldaýy úshin myń alǵys! Aýstralııaǵa oralý qashanda unaıdy. Bul jarystyń ereksheligi komandalyq saıys ekendiginde. Qazaqstan quramasy matchqa barynsha kúsh-jigermen shyǵa bildi. Ekinshi sette utylyp jatyp, tarazy basyn aýdara aldym, - dedi oıynnan soń E.Rybakına.

Osylaısha, Qazaqstan quramasy 2:0 esebimen alǵa shyǵyp, merziminen buryn jeńiske jetti. E.Rybakına Qazaqstan sapynda 10 match ótkizse, sonyń 8-in jeńispen aıaqtady.

Juptyq synda Anna Danılına Jibek Qulambaevamen birge Storm Hanter – Ellen Perespen oınaıdy.

Qazaqstan komandasy D tobynda erteń Kolýmbııamen synǵa túsedi. Kolýmbııany utsa, qazaqstandyqtar komandalyq álem chempıonatynyń fınaldyq kezeńine joldama alady.

Eske sala keteıik, budan buryn Elena Rybakınanyń aldaǵy jarysta qazaqstandyqtardyń qoldaýy óte mańyzdy ekendigi týraly aıtqanyn jazǵan bolatynbyz.

Sondaı-aq tennısten Qazaqstan quramasy Bıllı Djın Kıng týrnırinde alǵashqy matchta jeńiske jetti.