Bıll Klınton BUU-nyń Gaıtı ekonomıkasyn qalpyna keltirý jónindegi jobalarymen aınalysatyn bolady
ASTANA. Qańtardyń 22-si. QazAqparat - Birikken Ulttar Uıymynyń Gaıtı boıynsha arnaıy ókili jáne AQSh-tyń burynǵy prezıdenti Bıll Klınton zilzaladan zardap shekken Gaıtı ekonomıkasyn qalpyna keltirý máselelerin úılestirýmen aınalysatyn bolady.
Bul týraly beısenbi kúni jýrnalısterge BUU Bas hatshysy Pan Gı Mýn uıymnyń Nıý-Iorktegi shtab-páterinde Klıntonmen bolǵan kezdesýden keıin habarlady.
Qańtardyń 12-sinde bolǵan jerasty dúmpýleriniń saldarynan Gaıtıde, túrli málimetter boıynsha, 200 myńǵa deıin adam qaza tapty, úsh mıllıonǵa jýyq adam zardap shekti. Batys jartyshardaǵy eń kedeı el bolyp tabylatyn Gaıtıdiń ekonomıkasy úlken zardap shegip otyr, kelgen zardaptyń aýqymy BUU, Eýroodaq, Dúnıejúzilik bank jáne Amerıkaaralyq damý banki uıymdarynyń birlesken taldaýynyń barysynda anyqtalmaq.
Pan Gı Mýnnyń aıtýynsha, AQSh-tyń burynǵy prezıdenti BUU-nyń Damý baǵdarlamasynyń jobalaryn úılestiretin bolady. Bul jobalardyń aıasynda Gaıtı turǵyndaryn úıindilerdi arshý jáne zaqymdanǵan elektr symdaryn, qubyr jelilerin, baılanys jelilerin, joldardy jáne basqa da ınfraqurylymdardy jóndeý jumystaryna tartý qarastyrylyp otyr.
