Bıll Geıts JI-ǵa qatysty qaýipke alańdap, dabyl qaqty
ASTANA. KAZINFORM – Microsoft kompanııasynyń negizin qalaýshy Bıll Geıts osy jyldyń sońynda QHR prezıdenti Sı Tszınpınmen kezdesip, jasandy ıntellektpen baılanysty táýekelderdi azaıtý boıynsha halyqaralyq sharalardy usynýdy josparlap otyr, dep habarlaıdy NBC News.
Geıtstiń aıtýynsha, eger AQSh mundaı bastamany qolǵa alsa, Qytaı JI-dyń yqtımal qaýipti modelderin shyǵarýdy shekteýge kelisýi múmkin. Onyń komandasy qarasha aıynda Qytaıǵa saparlaýdy aldyn ala josparlap otyr.
Geıts sonymen qatar JI-dyń qaýipti molekýlalardy jáne bıologııalyq shabýyldar jasaý qabiletine halyqaralyq baqylaý qajet dep sanaıdy. Ol ıadrolyq ınspektsııa júıesiniń elementteri, halyqaralyq avıatsııa erejeleri jáne ozon qabatyn qorǵaý týraly kelisimderge negizdelgen jasandy ıntellektti retteıtin jańa halyqaralyq uıym qurýǵa shaqyrdy.
Mıllıarderdiń málimdeýinshe, ol sońǵy kezderi JI-men baılanysty qaýipterge alańdap júr. Atap aıtqanda, ony kıberqaýipsizdik boıynsha synaqtar kezinde OpenAI, Anthropic jáne Meta Platforms tehnologııalaryn paıdalanyp naqty veb-saıttardy buzý oqıǵalary alańdatty. Geıtstiń pikirinshe, mundaı oqıǵalar qoǵamdy jasandy ıntellekt damýynyń yqtımal saldary týraly oılandyrýy kerek.
Geıts AQSh jasandy ıntellektti retteýde jetekshi ról atqarýy kerek dep sanaıdy. Alaıda halyqaralyq qaýymdastyq sheshim qabyldaý úshin naqty krıterııler belgileýi qajet. Ol óz blogynda teńsizdikti ýshyqtyrmaıtyn jáne osal toptarǵa zııan keltirmeıtin jasandy ıntellekt jasaýǵa basymdyq berdi. Onyń pikirinshe, bul mindet klımattyń ózgerýi men densaýlyq saqtaý salasyndaǵy daǵdarystardan da mańyzdy.
Geıts qory 2045 jylǵa qaraı jasandy ıntellektke kóbirek kóńil bólip, 200 mlrd dollar jumsaýdy josparlap otyr. Uıym Anthropic-pen jasandy ıntellektke negizdelgen júktilikti skrınıngteý boıynsha jáne OpenAI-men Rýandadaǵy medıtsına qyzmetkerlerine arnalǵan quraldardy ázirleý boıynsha birlesip qyzmet atqaryp otyr.
Geıts sonymen qatar jumysshylardy aýystyrý úshin JI paıdalanatyn kompanııalarǵa salyq salýdy jáne jumys oryndarynyń 40%-yn adamdarǵa saqtaýdy usyndy. Ol qoǵam qazirgi ýaqytta eńbek naryǵyndaǵy bolashaq ózgeristerdiń aýqymyn baǵalamaı otyrǵanyn alǵa tartty.
Geıts JI arqasynda eńbek naryǵynda tóńkeris bolatynyn málimdegen edi.
