Bıll Geıts: Jasandy ıntellekt mıllıard adamnyń ómirine qaýip tóndirýi múmkin
ASTANA. KAZINFORM – Microsoft kompanııasynyń negizin qalaýshy Bıll Geıts jasandy ıntellekt adamzatqa aýqymdy qaýip týdyrýy múmkin ekenin aıtyp, AQSh bıligin bul salany zańmen retteýge shaqyrdy, dep habarlaıdy Deutsche Welle.
Geıtstiń pikirinshe, jasandy ıntellektiniń qýaty mıllıard adamnyń qaza tabýyna ákeletin oqıǵalardy týyndatýǵa jetkilikti deńgeıge jetýi múmkin.
– Adamzatty 100 paıyz joıyp jiberý óte qıyn bolǵanymen, jaman nıetti adamdar men jasandy ıntellektiniń eń jańa quraldarynyń úılesimi sekildi qýatty qarý buryn-sońdy bolǵan emes, – dedi Bıll Geıts NBC telearnasyna bergen suhbatynda.
Ol jasandy ıntellekt salasyndaǵy ózin-ózi retteý tetikteri jetkiliksiz dep sanaıdy. Sondyqtan AQSh bıligi tehnologııany damytý kezinde qaýipsizdik sharalary men baqylaý tetikterin belgileıtin zańdar qabyldaýy qajet ekenin aıtty.
– Zańnama salaǵa belgili bir qosymsha salmaq túsiredi, biraq kompanııalardyń jumysyn aıtarlyqtaı baıaýlatpaıdy, – dedi ol.
Jasandy ıntellekt modelderiniń naqty kompanııalarǵa jasaǵan keıingi shabýyldarynan soń iri tehnologııa ázirleýshileriniń basshylary da JI damýyn baıaýlatý ıdeıasyn qoldaǵan.
Mundaı usynysty Anthropic kompanııasynyń basshysy Darıo Amodeı de aıtqan. Ol jasandy ıntellektini baqylaýdan aıyrylyp qalý qaýpine, sondaı-aq tehnologııanyń kıbershabýyldar men bıoterrorızm maqsatynda paıdalanylýy múmkin ekenine nazar aýdardy.
Aıta keteıik, Avstralııa úkimetiniń júıesine jasandy ıntellekt zańsyz kirgen.
