Bıll Geıts pen Ilon Maskty shaqyraıyq - AQSh kompanııasy Nazarbaevqa erekshe baıqaý ótkizýdi usyndy

ASTANA. QazAqparat - «Beıker jáne Makenzı Interneshnl» kompanııasynyń basqarma tóraǵasy Edýardo Leıte Qazaqstanda jańǵyrý boıynsha halyqaralyq baıqaý uıymdastyryp, baıqaýda úzdik shyqqandarǵa «Jańǵyrý boıynsha Nazarbaevtyń syılyǵyn» tapsyrýdy usyndy, dep habarlaıdy QazAqparat tilshisi.

««Beıker jáne Makenzı» jańǵyrý boıynsha joba, naqtyraq aıtqanda, bizdiń kompanııa ár eki jyl saıyn jańǵyrý boıynsha syıaqy jáne baıqaý ótkizýdi usynady. Tarqata keteıin: árbir eki jyl saıyn Qazaqstanǵa álemniń jetekshi ýnıversıtetteriniń túlekteri shaqyrylyp, jańǵyrý jobasynyń usynysy negizinde baıqaýǵa qatysý úshin komandalar jasaqtalady. Bul qadam Qazaqstandy atalmysh salada kóshbasshyǵa aınaldyrary sózsiz. Árbir eki jyl saıyn ótetin baıqaýlardyń taqyryptary da ártúrli bolmaq», - deıdi Edýardo Leıte Sheteldik ınvestorlar keńesiniń 31-plenarlyq otyrysynda.

Onyń aıtýynsha, QR Úkimeti baıqaý úshin robototehnıka, jasandy ıntellekt, medıtsına, aýyl sharýashylyǵy, qorshaǵan orta, ǵaryshty zertteý, ınfraqurylym, kólik quraý, tasymaldaý, telekommýnıkatsııa, energııanyń balamaly kózderi  sekildi taqyryptardy tańdaı alady.

«Baıqaýdyń sharttary kelesi talaptarǵa saı bolýy kerek. Naqtyraq aıtqanda, olardyń jobalary elge paıdaly bolýy tıis. Joba ekologııalyq turǵyda bekem, tehnıkalyq tártipte iske asyrýǵa bolatyndaı, engizý merzimi belgili bolýy kerek. Komandalardyń usynysyn táýelsiz halyqaralyq sarapshylardan quralǵan arnaıy komıssııa qaraıdy. Bıll Geıts jáne Ilon Mask sekildi jalpyǵa tanymal sarapshylardy tóreshi retinde shaqyrýǵa bolady», - deıdi ol.

Edýardo Leıteniń usynysyna qaraǵanda, baıqaýdyń birinshi jáne ekinshi oryndaryn tapsyrý Nazarbaev Ýnıversıtetinde ótkiziletin bolady.

«Baıqaýdy ótkizýge baılanysty jeke ıntellektýaldyq menshikke qatysty zańgerlik suraqtar týyndaýy yqtımal. Men «Beıker jáne Makenzı» kompanııasy Qazaqstannyń Úkimetine qoldaý kórsetýge daıyn ekenin bekemdeı aıtamyn. Halyqaralyq sarapshylardy tartý, jalpyǵa belgili tóreshiler men ýnıversıtetterdi shaqyrý Qazaqstandy atalǵan salada kóshbasshyǵa aınaldyrary daýsyz. Prezıdent myrza, sizdiń ruqsatyńyzben, men atalǵan syılyqty «Jańǵyrý boıynsha Nazarbaevtyń syılyǵy» dep atar edim. Sondaı-aq, eń alǵashqy «Jańǵyrý boıynsha Nazarbaevtyń syılyǵy» 2020 jyldyń 6 maýsymynda tapsyrylsa degen oıymdy bildiremin», - deıdi ol.

Aıta ketsek, «Baker McKenzie» - 1949 jyly Chıkagoda irgesi qalanǵan halyqaralyq zańgerlik kompanııa. Qazirgi ýaqytta kompanııanyń ókilderi álemniń 47 elinde eńbek etedi.