Bıll Geıts Harrıstiń saılaý naýqanyna 50 mıllıon dollar berdi

ASTANA. KAZINFORM – Microsoft korporatsııasynyń negizin qalaýshy mıllıarder Bıll Geıts AQSh vıtse-prezıdenti, Demokratııalyq partııadan el prezıdenttigine úmitker Kamala Harrıstiń saılaýaldy naýqanyn qoldaıtyn úkimettik emes uıymǵa 50 mıllıon dollar berdi. Bul týraly New York Times habarlady.

Basylymnyń habarlaýynsha, Geıts qaıyrymdylyqty Kamala Harrısti qoldaıtyn Future Forward úkimettik emes uıymyna baǵyttaǵan jáne ol qupııa bolyp qalýy tıis bolǵan.

– Jaqynda Bıll Geıts vıtse-prezıdent Kamala Harrıstiń prezıdenttik naýqanyn qoldaıtyn kommertsııalyq emes uıymǵa qupııa túrde shamamen 50 mıllıon dollar qaıyrymdylyq jasady, - dedi máselemen tanys úsh derekkóz.

Geıtstiń pozıtsııasyna jaqyn derekkózdiń aıtýynsha, ol kez kelgen kandıdatpen jumys isteýge ashyq ekenin aıtqanymen, ol dostarymen jáne basqalarmen bıylǵy jyly áńgimelesýde respýblıkashyl kandıdat Donald Tramptyń ekinshi merzimge saılaný múmkindigi týraly alańdaýshylyq bildirgen. Geıts qaıyrymdylyq qoryna jaqyn derekkózderdiń aıtýynsha, Tramp qaıta saılanǵan jaǵdaıda otbasyn josparlaý men jahandyq densaýlyq baǵdarlamalaryn qysqartý múmkin ekendigi qor úshin úlken alańdaýshylyq týdyrady.

Habarǵa sáıkes, Geıts ajyratqan qarajat 501(c)(4) túrindegi uıym bolyp esepteletin Future Forward USA Action uıymyna jiberilgen, sol úshin de donorlardyń aty-jóni jarııa etilmeıdi.

AQSh-ta prezıdent saılaýy aǵymdaǵy jyldyń 5 qarashasynda ótedi. Kamala Harrıs Demokratııalyq partııadan, al burynǵy prezıdent Donald Tramp Respýblıkalyq partııadan úmitker bolady.

Buǵan deıin Ilon Mask Trampty qoldaý komıtetine keminde 75 mln dollar bólgenin jazǵan edik.

Sondaı-aq, Ilon Mask amerıkalyq saılaýshylarǵa aqsha taratty.