Bıll Geıts baılyǵyn túgelimen qaıyrymdylyqqa jumsamaq

ASTANA. KAZINFORM — Microsoft-tyń negizin qalaýshy Bıll Geıts aldaǵy jıyrma jyl ishinde óziniń baılyǵynyń 99 paıyzyn qaıyrymdylyqqa jumsaýǵa sheshim qabyldaǵanyn habarlady, dep jazdy BBC.

— Men ólgende men týraly can túrli pikirler aıtylýy múmkin, biraq meniń basty maqsatym — «ol baı kúıinde kóz jumdy» dep aıtpasa eken, — dep jazdy Bıll Geıts óziniń saıtynda. 

Ol bul oıdy amerıkalyq magnat ári metsenat Endrıý Karnegıdiń: «Baı kúıinde ólgen adam — abyroısyz ólgen adam» degen sózimen tolyqtyrdy.

Alaıda qazirgi jaǵdaıǵa qaraıtyn bolsaq, Geıts baılyǵynyń 99 paıyzyn taratsa da, mıllıarder kúıinde qala beredi. Ol jarııalaǵan málimetke sáıkes, onyń qazirgi baılyǵy shamamen 108 mıllıard dollar. 

Bıll men Melında Geıts qory uzaq jyldar boıy densaýlyq saqtaý jáne basqa da salalarǵa qarjy quıyp keledi. Biraq qazir Microsoft-tyń negizin qalaýshy qor qarajatyn jumsaý qarqynyn arttyrýǵa sheshim qabyldaǵan. Buǵan deıin qor olardyń qaıtys bolǵanynan keıin de ondaǵan jyldar jumys isteıdi dep josparlanǵan bolatyn. Endi Geıts qordyń barlyq qarjysyn 2045 jylǵa deıin tolyq jumsap, keıin jabylatynyn aıtty.

Bıyl kúzde Bıll Geıts 70 jasqa tolady.

Geıtstiń esebinshe, kelesi jıyrma jylda qor shamamen 200 mıllıard dollar jumsaıdy — naqty soma naryqtaǵy jaǵdaı men ınflıatsııaǵa baılanysty bolmaq. Al ótken 25 jyl ishinde Geıts qory álemniń ártúrli elderinde densaýlyq saqtaý men damý salalaryna 100 mıllıard dollar bólgen.

Aldaǵy kezeńde qor úsh negizgi maqsatty kózdeıdi:

1. Ana men balalardy óltiretin, biraq aldyn alýǵa bolatyn aýrýlarmen kúresý,

2. Malaırııa men qyzylsha sııaqty juqpaly aýrýlardy joıý,

3. Álemniń túrli elderindegi júzdegen mıllıon adamdy kedeılikten qutqarý.

Bul sheshimniń sebebi jaıly BBC arnasyna bergen suhbatynda Geıts: «Jıyrma jyldan keıin basqa baı adamdar paıda bolady, jáne olar adamdardyń máselelerin sheshýge qalaı kómektesýge bolatynyn jaqsyraq túsinedi», — dedi.

— Mundaǵy basty sebep — jedeldik. Eger máńgi ómir súrýdi josparlamasaq, áldeqaıda kóp qarjy jumsaýymyz kerek. Men bul shyǵyndardyń meniń qundylyqtaryma saı keletinin bilemin, — dedi ol.

Bıll Geıts pen Pol Allen Microsoft kompanııasyn 1975 jyly qurǵan. Bıyl bul kompıýter jáne aqparattyq tehnologııalar alybyna 50 jyl tolady. Geıts kompanııanyń bas dırektory qyzmetinen 2000 jyly, al dırektorlar keńesiniń tóraǵasy qyzmetinen 2014 jyly ketken. 2020 jyly ol kompanııanyń dırektorlar keńesinen birjola shyqty.

BBC arnasyna bergen suhbatynda burynǵy álemdegi eń baı adam Ilon Maskty qatty synady. Geıtstiń aıtýynsha, Masktyń Tramp ákimshiligindegi memlekettik basqarý tıimdiligi departamenti damýshy elderge kómekti qysqartý arqyly balalardyń ólimine sebepker bolyp otyr.

—Bul qysqartýlar jaı ǵana balalardy óltirmeıdi, olar mıllıondaǵan balanyń ómirin jalmaıdy. Álemdegi eń baı adamnan bulaı isteıdi dep kútpegen edim, — dedi Geıts.

Aıta keteıik, Geıts qory BBC Media Action — BBC-diń qaıyrymdylyq tarmaǵynyń demeýshisi bolyp tabylady. Bul uıym BBC-diń jańalyq bóliminen táýelsiz jumys isteıdi.

Eske sala keteıik, Bıll Geıts Harrıstiń saılaý naýqanyna 50 mıllıon dollar bergen edi.