Bıll Geıts AQSh-tyń atom energetıkasyn damytýǵa mıllıardtaǵan qarjy bólmek
ASTANA. KAZINFORM – Microsoft korporatsııasynyń negizin qalaýshy Bıll Geıts AQSh-taǵy atom energetıkasyn damytýǵa mıllıardtaǵan dollar ınvestıtsııa salý nıeti týraly málimdedi, dep habarlaıdy ria.ru.
«Men oǵan mıllıardtan astam dollar saldym jáne taǵy da mıllıardtaǵan ınvestıtsııa salamyn», - dedi Geıts CBS arnasyna bergen suhbatynda.
Onyń pikirinshe, Qytaı qazirgi ýaqytta ıadrolyq reaktorlardy eń kóp salyp jatyr. Biraq Qurama Shtattar sheteldik básekelesterden ozyp ketýi kerek. Geıts qazirgi amerıkalyq ıadrolyq reaktorlardyń tym qymbat ekenin atap ótti.
Sondaı-aq ol TerraPower jetekshiligimen Vaıomıngte atom elektr stantsııasyn salý jobasyn 2028 jyldan 2030 jylǵa shegerýge týra kelgenin eske saldy. Sebebi AQSh Reseıden keletin janarmaı aǵynyn shekteý týraly sheshim qabyldady. Degenmen Geıts kompanııanyń Ulybrıtanııa men Ońtústik Afrıkada janarmaı jetkizýshileri bar dep qosty.
