Bılik tranzıti týraly sóz qozǵaýǵa áli erte – Qasym-Jomart Toqaev

ASTANA. KAZINFORM – Bıyl Qazaqstannyń uzaq jyldarǵa arnalǵan baǵyt-baǵdary aıqyndalatyn jyl bolady. Bul týraly «Turkistan» gazetine suhbat bergen Memleket basshysy Qasym-Jomart Toqaev aıtty.

Suhbat barysynda Memleket basshysy bılik tranzıti týraly sóz qozǵaýǵa áli erte ekenin, aldymyzda tabandy jumysqa toly birneshe jyl bar ekenin basa aıtty. Sonymen qatar bıyl saıası turǵydan alǵanda qandaı jyl bolatynyna toqtaldy.

– Qazirdiń ózinde naqty aıta alamyn: bıyl el taǵdyryna tikeleı áser etetin, Qazaqstannyń uzaq jyldarǵa arnalǵan baǵyt-baǵdary aıqyndalatyn jyl bolady. Men konstıtýtsııalyq reformaǵa qatysty referendým ótetinin aldyn ala aıttym. Qazir sarapshylar tobymen birge Ata zańymyzdyń redaktsııasyna qatysty usynystardy qarap jatyrmyn. Josparlanǵan ózgerister óte kóp, bári tutasa kelgende jańa Konstıtýtsııa qabyldaýmen para-par qadam jasaımyz deýge bolady, - dedi Qasym-Jomart Toqaev.

Aıta keteıik, búgin Turkistan» gazetinde Memleket basshysy Qasym-Jomart Toqaevtyń atalǵan basylymnyń bas redaktory, belgili aqyn, pýblıtsıst Baýyrjan Babajanulyna bergen keń kólemdi suhbaty jarııalandy.