Bılik tranzıti kezinde saıasattaǵy aılakerler qosamjarlanǵan bılik ortalyǵyn qurýǵa tyrysty - Prezıdent
Prezıdent Qasym-Jomart Toqaev Egemen Qazaqstan gazetine bergen suhbatynda bázbireýlerdiń qosarlanǵan bılik júıesin ornatýǵa talpynǵanyn aıtty, dep habarlaıdy Kazinform.
«Ttipti, mundaı áreketterdi ádeıi ári muqııat uıymdastyrǵany ras. „Bılik tranzıti“ kezindegi ahýaldy saıasattaǵy aılakerler óz múddesine paıdalanyp, qosamjarlanǵan bılik ortalyǵyn qurýǵa tyrysty. Elimizde Prezıdent ári Joǵarǵy Bas qolbasshy laýazymy bir bólek, burynǵy Prezıdent ıelengen Qaýipsizdik Keńesiniń Tóraǵasy laýazymy bir bólek boldy. Osy eki laýazymnyń ıeleri bir mezette qatar qyzmet atqardy. Túptiń túbinde bul jaǵdaıdyń bılikte qatań teketires týǵyzbaı qoımasy anyq edi.
Muny az deseńiz, dál osy jaǵdaı Qańtar daǵdarysyna ákep soqtyrǵan alǵysharttyń biri boldy. Óıtkeni ymyralasqan qaskóıler ózderi oılap tapqan qosarlanǵan bılik, ıaǵnı «tandem» ıdeıasyn dáriptep, ony óz múddesine paıdalanǵysy keldi», — dedi Memleket basshysy.
Qasym-Jomart Toqaev keıbir laýazymdy tulǵalardyń, onyń ishinde burynǵy Ádilet mınıstriniń mártebe jaǵynan Elbasy Prezıdentten joǵary turatynyn aıtqany eske saldy.
«Keıbir sheneýnikter birese ana, birese myna kabınetti jaǵalap júrdi. Olar oınaqtap júrip, aqyry ot basty. Men keıinirek Nursultan Ábishuly Nazarbaevqa onyń jaqyn serikteriniń saıası qıturqylyǵy elimizdiń tas-talqanyn shyǵara jazdaǵanyn ashyq aıttym.
Qalaı desek te, memlekette úlken jáne kishi prezıdent degen bolmaýy kerek dep sanaımyn. «Kettiń be — qaıyrylma!» Bolashaqta el tizginin ustaıtyn azamattar osy jaǵdaıdan sabaq alyp, mundaı nárseden qashyq bolýǵa jáne tek qana memlekettiń múddesi men qoǵamnyń bereke-birligin oılaýǵa tıis», — degen Prezıdent.
Ol ishki saıası daǵdarysqa baılanysty týyndaǵan syn saǵatta negizgi quqyq qorǵaý organdary basshylarynyń betperdesi sypyrylyp, olardyń kásibı biliksizdigi, qala berdi satqyndyǵy áshkere bolǵanyn atap ótti.
«Ata zańǵa sáıkes jumys isteıtin ornyqty ári tıimdi memlekettik ınstıtýttar júıesin qurý aýadaı qajet ekeni Qańtar oqıǵasynan aıqyn kórindi. Biz bir el bolyp, bul daǵdarysty eńserdik, qıyndyqqa qasqaıa qarsy turyp, odan tipti shyńdalyp shyqtyq. Azamattarymyzdyń bekem birliginiń jáne barlyq deńgeıdegi bılik ókilderiniń batyl is-áreketiniń arqasynda alapat apattyń betin qaıtaryp, eldegi ahýaldy turaqtandyra aldyq. Keıin keıbir qaskóıler tergeý kezinde halyq jaýapty sátte judyryqtaı jumyla biledi, bılik qandaı qaterge de qaımyqpaı tótep bere alady dep esh kútpegenin moıyndady», — dedi Qasym-Jomart Toqaev.
