Bılik qurylymdary ınfraqurylym jobalarynyń ashyqtyǵyn qamtamasyz etýge mindetti — Prezıdent

ASTANA. KAZINFORM — Turǵyn úı-kommýnaldyq sharýashylyǵy men sý ınfraqurylymyn jańǵyrtý — turaqty damýdyń negizi faktory. Bul týraly Prezıdent Qasym-Jomart Toqaev Qazaqstan halqyna Joldaýy barysynda aıtty.

— Úkimet pen jergilikti atqarýshy bıliktiń áreketsizdigi saldarynan elimizdiń turǵyn úı-kommýnaldyq sharýashylyǵy ondaǵan jyl boıy qaraýsyz qalyp, onyń jaı-kúıi óte múshkil jaǵdaıǵa tústi. Qazir bul ahýaldy ózgertip, ınfraqurylymnyń tozý deńgeıin tómendetý úshin tıisti sharalar qabyldanyp jatyr. Sonyń ishinde tarıfterdi yryqtandyrý, energetıka jáne turǵyn úı-kommýnaldyq sharýashylyǵynyń ınfraqurylymyn basqarýdyń jańa modelin qalyptastyrý sııaqty sharalar bar. Mundaı úlgi boıynsha, tarıfter ósken saıyn halyqqa senimdi ári sapaly qyzmet kórsetilýge tıis. Bul iske «Aqyldy qala» qurý tujyrymdamasynyń kómegi tıeri sózsiz, ony elimizdiń barlyq óńirine taratý kerek. Oǵan ozyq halyqaralyq tájirıbelerdi qoldanyp, bilikti basshylardy, sonyń ishinde shetel mamandaryn tartý qajet, — dedi Qasym-Jomart Toqaev.

Prezıdenttiń aıtýynsha, qazirgi jaǵdaıda memleket pen bıznes seriktestik ornatpasa, turǵyn úı-kommýnaldyq sharýashylyǵyn jańǵyrtý múmkin emes.

— Bul — aksıoma. Keıbir turǵyn úı-kommýnaldyq sharýashylyǵy nysandaryn ákimdikterdiń qaramaǵynda saqtap qalý qajet pe, joq pa degendi jańasha zerdelegen jón. Jeke kommýnaldyq nysandardy memleket menshigine alý — daýly másele. Onyń bári erte me, kesh pe, qaıtadan jekeshege ótedi. Sondyqtan memleket bul salany baqylap, retteýmen aınalysýǵa tıis. Al onyń ınfraqurylymyn jańǵyrtý jáne jańa tehnologııalardy engizý — jeke sektordyń sharýasy. Bılik qurylymdary negizinen tsıfrlyq tásilderdi qoldana otyryp, ınfraqurylym jobalarynyń ashyqtyǵyn qamtamasyz etýge mindetti. Sonda Úkimetke jáne ákimdikterge azamattardyń senimi nyǵaıa túsedi. Kommýnaldyq sharýashylyqty jańǵyrtý isi ınfraqurylymdar men turǵyn-úı qoryn energııany únemdeýge kóshirý sharalarymen qatar júrýge tıis, — dedi Memleket basshysy.

Aıta keteıik, Joldaýdyń onlaın translıatsııasy Jibek Joly efırinde, sondaı-aq telearnanyń YouTube arnasynda júrip jatyr.

Kazinform saıty tikeleı efırmen qatar, jazbasha translıatsııa da jasaıdy.

Sondaı-aq Joldaý mátinin agenttiktiń telegram arnasynan oqýǵa bolady.