Bilimniń irgetasy bastaýyshta qalanady – Gúlshat Sýhanova

Gúlshat Rahymqyzy – bilim salasynda 35 jyl boıy ter tógip kele jatqan bilikti ustaz, pedagog-zertteýshi. QR Bilim jáne ǵylym mınıstrliginiń qurmet gramotasy jáne basqa marapat, alǵyshattardyń ıegeri.

-Gúlshat Rahymqyzy, ustaz bolýdy bala kúnnen

armandadyń ba, bul maqsatyń qaı kezden bastap júzege asty dep oılaısyń, kimderden úlgi aldyń?

-Iá, ustaz bolý armanym edi, sebebi ata-anamnyń ekeýi de muǵalim bolatyn. Qaztalov aýdany Ájibaı aýylynda týyp- ósip, sondaǵy Birik orta mektebinde bilim aldym. Ákem Rahym mektep dırektory, anam Gúljııan qazaq ádebıetiniń muǵalimi edi. Naǵashylarym da ustazdar-tuǵyn. Bala kezimde mektep bolyp oınaýshy edik, men únemi muǵalim bolatynmyn. Keıde aınaǵa qarap, ustazdarymdy aınytpaı salatyn edim. Men úshin olardyń bári de úlgi boldy. Alǵash

Valentına Rýdolfqyzy Tájiǵalıeva álippeni ustatsa, 5- synyptan jetekshim bolǵan Shyntemirova Kúlásh apaıymdy saǵynyshpen eske alamyn. Oral pedagogıkalyq ýchılışesin úzdik bitirgennen keıin aldymen aýylda ustazdyq ettim. Keıin Oraldaǵy bilimniń qara shańyraǵy – Sáken mektebine keldim.

-Toqsan jylǵa jýyq tarıhy bar ataqty mekteptiń tabaldyryǵyn alǵash attaǵan sátte qandaı sezimde boldyń?

-Qorqynysh pen maqtanysh birdeı boldy-aý dep oılaımyn. Ol kezde mektep dırektory Ersaıyn Qadyruly Saparov bolatyn. Ol kisi óte isker, jańashyl, eńbekqor, sondyqtan da basqalardan sony talap etetin. Men sııaqty jas muǵalimge úlgi bolar ustazdar óte kóp boldy. Qazirgi tańda solardyń bári derlik zeınetke shyqty. Osy kúni barlyǵyn da saǵynamyn, óıtkeni bizge aıtatyn aqyly men syndary, kıim kıisteri men ózderin ustaýlary, sóz saptaýlary, sabaq berýleri – bári bólekshe, úlgi bolatyn.

Jalpy, ózim bastaýysh synyp muǵalimi ekenimdi maqtan etemin, sebebi bilim negizi osynda qalanady. Búldirshinderdiń tuńǵysh tabaldyryq attaýy, árip tanı bastaýy, jazýy, býyndap oqýy – osynyń báriniń qıyndyǵy men qýanyshy jeterlik. Bastaýysh synyp oqýshysy pák, taza, ustazyna bárin biledi, maǵan úıretedi degen senimmen kózderi jáýdirep qarap otyrady. Keıin sol shákirtterim taýdaı bolyp ósip, joǵary bilim alǵannan keıin úlken azamatqa aınalady.

-Bıyl indetke baılanysty qashyqtan oqytý qolǵa

alynǵany belgili. Osyǵan oraı bilim deńgeıi tómendep ketken joq pa, tájirıbeli ustaz retinde ne aıtar ediń?

-Ótken oqý jylynyń sońynda qashyqtan oqytýdyń qıyndyqtary, árıne, boldy. Óıtkeni biz buǵan deıin onlaın túrde oqytyp kórmep edik. Degenmen, eń bastysy, muǵalim, oqýshy, ata-ana, bir-birimizben túsinise otyryp, qaı platformada oqyǵan tıimdi ekenin anyqtap, aqyldasyp aldyq. Jaz mezgilinde oblystyq bilim basqarmasynyń uıymdastyrýymen «Qashyqtan bilim berý» kýrsyn támamdap, sertıfıkat aldyq, munyń da járdemi tıdi. Qazirgi tańda birneshe platformany qoldanyp, oqýshyǵa úıretýdemiz. Bastaýysh synyp oqýshylary topqa bólinip, kezekshi synyptarda oqyp jatyr. Bilim deńgeıi tómendep ketti dep aıtyp júrgender az emes, ol da negizsiz bolmas. Sebebi úıdegi ata-analardyń tárbıeleri men talaptary ár túrli. Ata-ana balasyna jaǵdaı jasap, ýaqyt taýyp, qoldaý kórsetip, qasynda otyrsa, úlken kómek bolady, onyń sabaqty túsinip oqýyna septigi tıedi. Qazir

mektepke kelmeıtin oqýshylar bar, solarǵa onlaın dáris berýdemin. Shynymdy aıtsam, olardy qatty saǵyndym.

-Muǵalimder kúninen ne kútesiń? «Shákirtsiz ustaz tul» demekshi, olardyń basty tabys-jetistikteri qandaı, ár qıyrda júrgen shákirtteriń habarlasyp tura ma?

-Barlyq ustazdar sekildi, muǵalimder merekesin asyǵa kútemin. Ertemen shákirtterim telefon shalyp, quttyqtap jatady. Ózderiniń jetistigin aıtyp, qýantady. Barlyǵy da

maqtaýǵa turarlyq. Birde tańmen sabaq bastalar aldynda Aıbek Saǵynaev degen oqýshym Prezıdenttiń jastar kadry rezervine engenin habarlady. Sol kúni taǵy bir shákirtim Amangeldi Nurmanov Bi Group kompanııasy qurylys jobalarynyń bastyǵy bolyp taǵaıyndalǵanyn jetkizdi.

Ekeýi de bir synypta oqydy, qazir Nur-Sultan qalasynda turady. Bir oqýshym Jansultan Nurmuhanov halyqaralyq «Bolashaq» baǵdarlamasymen Anglııadan oqyp kelip, aýyldy túletemin dep, Syrym aýdanynda mektep dırektory bolyp jumys istep jatyr. Ol jetekshi oqý oryndarynda, Nazarbaev zııatkerlik mektebinde eńbek etti. Soǵan qaramastan, aýylǵa bet buryp, sondaǵy bilim salasyn kóteremin dep maqsat qoıýy erlik, úlgi alarlyq is dep oılaımyn. Shákirtterimniń biri zańger, biri kásipker, biri munaıshy bolyp, túrli salada tabysty qyzmet atqarýda.

Olardyń izimen jelkildep ósip kele jatqan jetkinshekter de barshylyq. Osynyń ózi bizdiń Qazaq eliniń bolashaǵy jarqyn ekendigin kórsetedi.

Sózimdi qorytyndylaı kele, mektebimniń dırektory Aıagóz Orynbaıqyzy bastaǵan barlyq áriptesterimdi tól merekemizben quttyqtap, jas urpaqqa sapaly bilim berýde tabysqa jete berýlerine tilektestigimdi bildiremin.