Bilimge salynǵan ınvestıtsııa 1,5 ese ósti

ASTANA. QazAqparat – Bıyl qańtar-qyrkúıekte bilim salasynyń negizgi kapıtalyna salynǵan ınvestıtsııa 219,1 mlrd teńgege jetti. Bul ótken jylmen salystyrǵanda aqshalaı túrde 49,2 paıyzǵa kóp, dep habarlaıdy QazAqparat tilshisi.

Finprom málimetinshe, óńirler arasynda ınvestıtsııanyń eń kóp kólemi ádettegideı Almatyǵa tústi - 61,7 mlrd teńge. Jyldyq ósim 2,3 esege jetip otyr.

Sonymen qatar úzdik úshtikke Túrkistan oblysy (33,9 mlrd teńge) men Shymkent qalasy (22,3 mlrd teńge) kiredi.

Atalǵan úsh aımaqqa elimizde bilim salasyna salynǵan ınvestıtsııanyń 53,8 paıyzy tıesili.

Eń tómengi kórsetkish Ulytaý oblysynda tirkelip otyr. Ne bári - 337,7 mln teńge. Qaraǵandy men Aqtóbe oblystaryna da ınvestıtsııa az salynǵan.

Bilim berýge salynǵan kúrdeli salymdardyń úshten ekisi derlik jergilikti bıýdjet esebinen qamtamasyz etildi - 136,5 mlrd teńge. Bul bir jyl burynǵydan 64,9 paıyzǵa artyq.

Salaǵa kásiporyndardyń menshikti qarajaty esebinen 51,6 mlrd teńge, respýblıkalyq bıýdjet qarajatynan 21,8 mlrd teńge, bank nesıesinen 6,5 mlrd teńge, banktik emes qaryzdardan 2,8 mlrd teńge salynǵan.