Bilimdi, ıntellektýaldy adamdarsyz, ozyq ǵylymsyz Qazaqstannyń perspektıvasy joq - N. Nazarbaev
A. Qarashanyń 13-i. QazAqparat /Ernur Aqanbaı/ - Bilimdi, ıntellektýaldy adamdarsyz, ozyq ǵylymsyz Qazaqstannyń perspektıvasy joq.
Tikeleı jelide qazaqstandyqtardyń saýaldaryna jaýap bergen Elbasy Nursultan Nazarbaev osylaı dep málimdedi, dep habarlaıdy QazAqparat.
«Jaqynda Ál-Farabı atyndaǵy Qazaq ulttyq ýnıversıtetinde sóılegen sózimde men bizdiń ıntellektýaldy qoǵam qurýdyń aldynda turǵanymyz, Qazaqstannyń ıntellektýaldy elıtasyn daıyndaý jaıly aıttym. Bilimdi, ıntellektýaldy adamdarsyz, ozyq ǵylymsyz Qazaqstannyń perspektıvasy joq. Qazir adamdardyń básekelestigi, bilimniń básekelestigi, ǵylymnyń básekelestigi júrýde. Buǵan daıyldalý qajet», dedi óz sózinde N. Nazarbaev.
Bul rette Elbasy óziniń tapsyrmasymen búginde «20 ıntellektýaldy mektep» qurylyp jatqanyn, olarǵa talantty, olımpıadalarda jeńimpaz atanǵan balalar alynatynyn atap ótti. «Adamdardyń barlyǵy talantty emes, buǵan eshkim renjimes, ol mektepterge balalar konkýrstar arqyly qabyldanady», dedi Prezıdent. Elbasynyń aıtýynsha, Astanada, Semeıde jáne Kókshetaýda osyndaı úsh mektep salyndy. Taıaý ýaqytta mundaı mektepter basqa da óńirlerde ashylatyn bolady.
«Osyǵan baılanysty biz talantty balalar oqý bitirgennen keıin bilim alatyn Astanada aıryqsha jańa halyqaralyq ýnıverstet salýdamyz», dedi N. Nazarbaev. Elbasynyń aıtýynsha, ýnıversıtettiń árbir fakýlteti Batystyń iri ýnıversıteteriniń basqarýynda bolady. Bul ýnıversıtette oqyp, bitirgender eki dıplom - Qazaqstan ýnıversıtıtetiniń jáne Batys ýnıversıtetiniń dıplomdaryn alady.
