Bilim jyly: Qaraǵandy oblysynda túıtkildi máseleler sheshimin tabady
ASTANA. QazAqparat - 2018 jyly Qaraǵandy oblysynda bilim salasyndaǵy máselelerdi tolyqqandy sheshý qolǵa alynady. Bul týraly aımaq basshysy Erlan Qoshanov halyq aldyndaǵy eseptik kezdesýi barysynda málim etti, dep habarlaıdy QazAqparat ákimniń saıtyna silteme jasap.
«Bilim salasynda balabaqshalardaǵy oryn jetispeýshiligi, úsh aýysymdyq oqý jáne mektepterdiń apattyq jaǵdaılary birinshi kezekte sheshilýi tıis máseleler qatarynda qalyp otyr. Sol sebepti, 2018 jyldy biz bilim salasyndaǵy máselelerdi sheshý jyly dep belgiledik. Jumystar jasalyp jatyr. Bıyl biz Temirtaýda jáne Aqtoǵaı men Ulytaý aýdandarynda úsh mektepti iske qosý arqyly apatty mektepter máselesin sheshemiz»,- deıdi Erlan Qoshanov.
Oblystaǵy mektepterdiń 72 paıyzy 1980 jylǵa deıin salynǵan ǵımarattar. 2018 jyly 132 nysanda jóndeý jumystaryn júrgizý úshin bıýdjetten 5 mlrd teńge bólindi.
Sonymen qatar, barlyq mektep janyndaǵy ınternattardy jóndeý jáne materıaldyq-tehnıkalyq bazamen qamtý úshin qarjy bólindi.
«Aýyldyq óńirlerge jumys saparlarymnyń barysynda men únemi ınternattarǵa baramyn. Jasyrmaı aıtaıyn, jaǵdaılary máz emes, eshbir syn kótermeıdi. Al biz balalarǵa - kerisinshe, úıdegideı atmosfera jasaýymyz kerek. Bul máselelerdi sheshetin bolamyz»,-dedi Erlan Qoshanov.
Oblysta mektepke deıingi bilim memlekettik-jekemenshik seriktestiktiń arqasynda damyp keledi.
«Biz jeke bıznespen ózara baılanys mehanızmin taptyq. Onyń biri Qaraǵandydaǵydaı memlekettik tapsyrys kólemin arttyrý. Osy tájirıbeni oblystyń basqada qalalary men aýdandarynda iske asyrý kerek. Ótken jyldy eskere biz balabaqshalarda 5,5 myńnan asa jańa oryndardy usynamyz, onyń 4 myńy jeke ınvestıtsııalardy tartý esebinen. Bıylǵy jyly biz 3 pen 6 jas aralyǵyndaǵy barlyq búldirshinderdi 100% mektepke deıingi bilimmen qamtý josparyn qoıyp otyrmyz»,-deıdi aımaq basshysy.
