Bilim júıesi «e-learning» jobasyna kóshýge daıyn emes - D. Nazarbaeva
ASTANA. QazAqparat - Elimizdegi bilim júıesine «e-learning» jobasyna kóshýge daıyn emes. Bul týraly búgin Májilistiń Áleýmettik-mádenı damý komıtetiniń keńeıtilgen otyrysynda palata vıtse-spıkeri Darıǵa Nazarbaeva osylaı málim etti.
Toqtala ketetin jaıt, basqosýda elimizdegi aqparattandyrý jobalarynyń júzege asyrylýy talqylanǵan bolatyn.
Talqylaý barysynda vıtse-spıker baǵdarlamanyń ataýynyń ózi onyń mazmunyna saı kelmeıtinin alǵa tartty. Onyń aıtýynsha, elektrondyq oqytý máselesiniń kóterilgenine biraz jyl ótip, osy baǵytta birshama bıýdjet qarajaty jumsaldy. «Biz «e-learning» júıesi týraly aıtqanda adam shatasatyn boldy. Óıtkeni, barlyǵy sabaqtaǵy oqýlyqtar men elektrondyq ádistemelik materıaldy kútedi. Al biz osy ýaqytqa deıin mektep dırektory, muǵalimder, jýrnaldar, kúndelikter men oqýshylardyń sabaq úlgerimi týraly aıtýdan asa almadyq, al bulardyń eshqaısysynyń «e-learning» júıesine qatysy joq qoı», - dedi D. Nazarbaeva. Bul rette vıtse-spıker elimizdiń bilim júıesi «e-learning» júıesin engizýge eń áýeli kadrlyq qamtamasyz etý turǵysynan ázir emes ekenin alǵa tartty.
Óz kezeginde depýtat Meıram Begentaev bundaı elektrondyq júıeni engizýdiń «oqýshy sómkesin» jeńildete túsetinin alǵa tartady. «Shyndyǵynda, bilim berýdegi sandyq tehnologııalar zildeı oqýlyqtardy almastyra alatyn edi. Degenmen, ony engizýdi sapaly júzege asyrý qajet, bul úshin sapaly Internet kerek. Sondyqtan da, «e-learning» júıesiniń ózi sapaly jumys isteı bastaǵanda, oqýshylar da oqýlyqtan qutyla bastaıdy dep oılaımyn», - dedi M.Begentaev. Bul rette depýtat «e-learning» júıesiniń tıimdiligin aıta kele, ondaǵy basty másele sapaly engizýge qatysty ekenine toqtaldy. Onyń aıtýynsha, «e-learning» júıesin engizgende onyń qaǵaz jolymen qaıtalanýyn boldyrmaý da mańyzdy, óıtkeni munyń ózi muǵalimniń jumysyn kidirtedi.
