«Bilim» jáne «Mádenıet» telearnalary birigedi - M. Qul-Muhammed

ASTANA. 11 qarasha. QazAqparat - "Bilim" jáne "Mádenıet" telearnalaryn biriktirý jónindegi sheshim qabyldandy. Bul týraly QR Prezıdenti janyndaǵy Ortalyq kommýnıkatsııalar qyzmetinde ótken búgingi brıfıngte QR Mádenıet jáne aqparat mınıstri Muhtar Qul-Muhammed málim etti.

«Iá, bul arnalardyń reıtıngisi joǵary emes. Alaıda, Reseıdiń mádenıet arnasynda da týra sondaı jaǵdaı qalyptasyp otyr. Sebebi osy sanattaǵy arnalardyń ózindik aýdıtorııasy bolady. Biraq, bizge tanymdyq ári ǵylymı kórkemdik arnalar qajet. Sondyqtan biz "Mádenıet" pen "Bilimdi" biriktirip jatyrmyz. Aıta keter jaıt, úzdik ári kórermenderdiń súıikti baǵdarlamalaryna arnalǵan jobalar qalady», - deıdi M. Qul-Muhammed.

Mınıstr atap kórsetkendeı, eki arna negizinde qurylatyn jańa arna kelesi jyldyń basynda ashylady. Ol «Habar» telearnasynyń quramynda jumys isteıdi.