Bilim jáne ǵylym júıesiniń barsha qyzmetkerleri Prezıdent N. Nazarbaevtyń ókilettigin 2020 jylǵa deıin uzartý bastamasyn qoldaıdy - B. Jumaǵulov
ANA. 19 qańtar. QazAqparat /Qanat Mámetqazyuly/ - Bilim jáne ǵylym júıesiniń barsha qyzmetkerleri Prezıdent N. Nazarbaevtyń ókilettigin 2020 jylǵa deıin uzartý bastamasyn qoldaıdy. Búgin Úkimet basshysy Kárim Másimovtyń qatysýymen ótken Bilim jáne ǵylym mınıstrliginiń alqa májilisinde vedomstvo basshysy Baqytjan Jumaǵulov osylaı málim etti.
«Ótken jyl Qazaqstan úshin tabysty ári saıası mańyzdy oqıǵalarǵa toly jyl boldy. Onyń eń bastysy - Astanada ótken EQYU Sammıti. Sharanyń ótýi elimizdiń orasan zor jetistikterin álem jurtshylyǵy tanyǵanynyń aıqyn kórinisi. Bul QR Tuńǵysh Prezıdenti - Elbasynyń saıası baǵytynyń ǵalamat jetistigi», - dedi Baqytjan Jumaǵulov.
Sonymen qatar Qazaqstan áleýmettik-ekonomıkalyq damý jolynda úlken belesterge jetýdi kózdep otyrǵanyn aıtqan mınıstr, ekonomıkalyq jetistikterge de toqtalyp ótti. «Jańa jyl jańa ýaqyttyń bastalǵanyn, jańa bıikterge, eń joǵary nátıjelerge qol jetkizý qajettigin kórsetip otyr. Sondyqtan da, biz ǵylym-bilim júıesiniń barlyq qyzmetkerleri, QR Prezıdenti N. Nazarbaevtyń ókilettigin 2020 jylǵa deıin uzartý týraly bastamany biraýyzdan qoldaımyz. Memleketimizdiń qaryshtap damýyn jáne týǵan elimiz Qazaqstannyń ıgiligi úshin Ult kóshbasshysy belgilegen strategııalyq josparlar men bastamalarǵa qol jetkizýdi tek Tuńǵysh Prezıdentpen ǵana baılanystyramyz», - dedi mınıstr.
