Bilim jáne ǵylym vıtse-mınıstri ýnıversıtetterdiń jataqhanalarynda shaǵyn balabaqshalar ashýdy usyndy
ASTANA. 29 qańtar. QazAqparat /Gúlmıra Álıakparova/ - QR Bilim jáne ǵylym vıtse-mınıstri Mahmetǵalı Sarybekov ýnıversıtetter jataqhanalarynyń bazasynda shaǵyn balabaqshalar ashýdy usyndy.
Búgin vıtse-mınıstr, Prezıdent N.Nazarbaevtyń «Bolashaqtyń irgesin birge qalaımyz» atty Qazaqstan halqyna arnaǵan Joldaýyn túsindirý maqsatynda Astanadaǵy S.Seıfýllın atyndaǵy Qazaq agrotehnıkalyq ýnıversıtetinde boldy.
M.Sarybekov, Elbasy bıylǵy Joldaýyn eldiń bolashaǵy men keleshegi - jastarǵa arnalǵanyn atap ótip, strategııalyq qujat - ýnıversıtet qabyrǵasynda sapaly bilimmen qatar, tálim-tárbıe alyp, jan-jaqty damyǵan tulǵa, bilimdi maman retinde qalyptasýǵa úndeıtindigin aıtty.
«Tárbıe tal besikten bastalady», dep mınıstr óz sózin, balabaqshalardaǵy oryn tapshylyǵyn joıý maqsatynda júzege asyrylyp jatqan «Balapan» baǵdarlamasynyń negizgi mindet-maqsattaryn túsindirýden bastady.
N.Nazarbaev óz Joldaýynda atap kórsetkendeı, 2010 jyldyń ózinde baǵdarlama aıasynda 35balabaqsha,1534shaǵyn ortalyq pen137jeke menshik balabaqshalar salyndy. Buryn jekeshelendirilip ketken mektep jasyna deıingi balalar mekemelerin qaıtarý esebinen 172 balabaqsha ashyldy.
Vıtse-mınıstr, Baǵdarlama sheńberinde balabaqshalardy ashý protsedýralary jeńildetilgenin, sonyń ishinde jeke menshik sektorǵa jiti nazar aýdarylyp otyrǵanyn qadap aıtty.
«Jeke menshik sektor damý úshin Bilim mınıstrligi tarapynan úlken jumystar atqarylýda. Birinshiden, menshik túrine qaramaı memlekettik tapsyrysty barlyq balabaqshalarda ornalastyrýdamyz. Ekinshiden, sanıtarlyq normalar men erejeler jeńildetildi. «Balapan» baǵdarlamasy alǵashqy jyldary shaǵyn balabaqshalardy ashýǵa baǵdarlanǵan. Olar qazir turǵyn úılerdiń birinshi jáne ekinshi qabattarynda, mektepter men joǵary oqý oryndarynyń, kásiporyndardyń bazasynda qurylýda. Sondyqtan, ýnıversıtetke de osyndaı shaǵyn ortalyqtardy ashý jóninde oılanýdy usynamyn», - dedi ol.
Mınıstrdiń aıtýynsha, bul JOO-nyń óz qyzmetkerleri men pedagogtaryna, ásirese balalary bar jas otbasylaryna tıimdi bolady. Onyń sózine qaraǵanda, mundaı tájirıbeni búginde Arqalyq qalasyndaǵy oqý orny paıdalanyp otyr.
Vedomstvo basshysynyń orynbasary sondaı-aq, orta bilimmen qamtamasyz etý, eldegi joǵary bilim berý úrdisterin eýropalyq standarttar men sapaǵa sáıkestendirý maqsatyndaǵy memlekettiń júrgizip otyrǵan saıasaty týraly, sonyń ishinde «Nazarbaev ýnıversıteti» men Tuńǵysh Prezıdenttiń zııatkerlik mektepteri jaıynda baıandady.
