Bilim jáne ǵylym vıtse-mınıstri UBT tapsyrý barysynda 5-shi pánniń nelikten bilim berý grantyn taǵaıyndaý baıqaýynda esepke alynbaıtyndyǵy týraly túsinik berdi
ASTANA. Aqpannyń 20-sy. QazAqparat /Marlan Jıembaı/ - Búgin QR bilim jáne ǵylym vıtse-mınıstri Mahmetqalı Sarybekov Ulttyq biryńǵaı test tapsyrý barysynda besinshi pánniń, atap aıtqanda qazaq tildi mektepter úshin orys tiliniń, orys tildi mektepter úshin qazaq tiliniń baly bilim berý grantyn taǵaıyndaý barysyndaǵy baıqaýda esepke alynbaıtyndyǵy jóninde túsinik berdi.
Ol bul týraly búgin elordada ótken UBT ótkizýdi uıymdastyrý jáne daıyndyq máseleleri boıynsha keńeıtilgen májiliste aıtty.
Bul jóninde «Bilim berý týraly» QR Zańynda naqty jazylǵandyǵyn, sonymen qatar osydan eki jyl buryn Qazaqstan halyq Assambleıasy Bilim jáne ǵylym mınıstrligine ótinish bildirgenin atap ótken ol «qazaq nemese orys tilderin tolyq baǵdarlamada oqymaıtyn oralmandar men qazaq dıasporasy ókilderiniń pikirlerin esepke ala otyryp, memlekettik bilim berý grantyn alý baıqaýynan besinshi pýnkti alyp tastaý týraly ótinish bergen bolatyn», dedi.
Vıtse-mınıstrdiń aıtýyna qaraǵanda, osyndaı sebeptermen atalǵan pánnen jınalǵan bal UBT sertıfıkatynda kórsetilmeıdi. Máselen aldaǵy jyldarda 5-shi pánniń baly kórsetilgen kezde abıtýrentter men olardyń ata-analary arasynda sertıfıkatta kórsetilgen bal 4 álde 5 pánniń qorytyndysy ekendigine túsinbeýshilik týyndaǵan. Sondaı-aq ol test tapsyrylatyn pánderde de esh ózgeris bolmaıtyndyǵyn alǵa tartty. Sonymen aǵymdaǵy jyly da túlekter 5 pánnen, atap aıtqanda bilim alyp jatqan tili, matematıka, Qazaqstan tarıhy, beıindik pánder jáne qazaq tildi mektepter úshin orys tilinen, orys tildi mektepter úshin qazaq tilinen test tapsyratyn bolady.
