Bilim jáne ǵylym vıtse-mınıstri Mahmetqalı Sarybekov Almaty qalasynyń stýdent jastarymen kezdesti

dep habarlaıdy QazAqparat.

Kezdesýdiń maqsaty - Elbasynyń Qazaqstan halqyna arnaǵan «Jańa onjyldyq - jańa ekonomıkalyq órleý - Qazaqstannyń jańa múmkindikteri» atty Joldaýyn túsindirý, jastar arasynda talqylaý bolyp tabylady.

M. Sarybekov Elbasynyń qazirgi ekonomıkalyq-áleýmettik, sondaı-aq ishki jáne syrtqy saıasattaǵy aıqyn baǵyttary men baǵdarlaryn aıqyndap, osy saladaǵy jumystardy nyǵaıtýdy tapsyrǵanyn atap ótti. Ol sonymen qatar elimizdegi bilim jáne ǵylym salasynda qol jetkizilgen jetistikterge toqtalyp, «jaqynda Úkimette Elbasynyń tapsyrmasymen, naýryz aıynyń 15-de «Balapan» baǵdarlamasy engizilip, joba bekitiledi dep otyrmyz. Bul joba Respýblıkamyzda tuńǵysh ret qabyldanatyn strategııalyq joba bolmaq. Elimizde mıllıonǵa jýyq mektepke deıingi balalar bar, onyń búginde 18 paıyzy mektepke deıingi mekemelermen qamtylyp otyr. Sondyqtan qazir, balabaqshalardyń jańa túrlerin, jeke menshik balabaqshalardy ashýdy kózdep, iske asyryp jatyrmyz. 2015 jyly balabaqshalardyń 70 paıyzyn qamtýdy, 2020 jyly bul kórsetkishti 100 paıyzǵa jetkizýdi kózdep otyrmyz», dedi vıtse-mınıstr.

Sondaı-aq ol Joldaýdyń mańyzdylyǵyna toqtala kele, «bul Joldaý - ár qazaqstandyqtyń, onyń ishinde jastardyń bolashaq damýynyń strategııasy. Bul Joldaýdy «jol kartasy» desek te bolady», dep atap ótti.

Kezdesý barysynda Almaty qalasynyń belsendi jastary Joldaý boıynsha óz pikirlerin bildirip, oı bólisti.