Bilim jáne ǵylym mınıstrliginiń ókilderi ulttyq biryńǵaı testileýge daıyndyq barysyn talqyǵa saldy
ASTANA. 29 qańtar. QazAqparat - Keshe, 28-shi naýryz kúni Bilim jáne ǵylym mınıstri Baqytjan Jumaǵulovtyń qatysýymen Ulttyq testileý ortalyǵynda ulttyq biryńǵaı testileýge (UBT) daıyndyq barysy qaraldy, dep habarlaıdy Bilim jáne ǵylym mınıstrliginiń baspasóz qyzmeti.
Baspasóz málimetterine qaraǵanda, ulttyq biryńǵaı testileý 2004 jyly engizildi. 8 jyl ishinde oǵan 1 mıllıon 200 myń adam qatysty.
Bıylǵy jyly ulttyq biryńǵaı testileýge 125 myń mektep bitirýshi qatysady dep kútilýde. Bul jalpy mektep bitirýshiler sanynyń 80 paıyzy. 10 naýryzdan 25 sáýirge deıin elimizdiń barlyq mektepterinde testileýge qatysý úshin ótinishter qabyldaý júrgizilýde. «Bilim týraly» Qazaqstan Respýblıkasy Zańynyń 28-babynyń 9-tarmaǵyna sáıkes mektepti bitiretin jyly joǵary oqý ornyna túskisi keletinder mindetti túrde ulttyq biryńǵaı testileýge qatysýlary kerek.
Nazarbaev zııatkerlik mektebi men ózge de halyqaralyq mektepterdiń túlekteri Qazaqstan Respýblıkasy Úkimetiniń aıqyndaýymen ulttyq biryńǵaı testileýden bosatylady. Ulttyq biryńǵaı testileý 1-15 maýsymda arnaıy jabdyqtalǵan 154 tirekte uıymdastyrylady. 107 ulttyq biryńǵaı testileý tirekteri aýdan ortalyqtaryndaǵy jáne qalalardaǵy mektepterde, 47-i oblys ortalyqtarynda, Astana men Almaty qalalaryndaǵy joǵary oqý oryndarynyń bazasynda ornalasqan.
Bıylǵy jyly testileýdi ótkizý úshin qajetti sharttardy qalyptastyrý maqsatynda 10 testileý tiregi jańadan salynǵan ǵımarattarǵa aýystyryldy jáne 2 tirek Ońtústik Qazaqstan oblysynyń Kentaý qalasyna, sondaı-aq Atyraý oblysynyń Inderbor kentine kóshirildi. Ulttyq testileý ortalyǵy 900 myń synaq jáne suraq-kitapshalary men ulttyq biryńǵaı testileý pánderi boıynsha 200 myń oqý-ádistemelik quraldaryn shyǵardy. Sonymen qatar ulttyq biryńǵaı testileý júzege asyrylatyn test tapsyrmalarynyń bazasy jańartyldy. Atalmysh baza 142 myń 806 tapsyrmadan turady. Olar baıqap kórýden ótkizilgen. Oǵan 11 myń 430 mektep bitirýshi qatysty. Alǵash ret matematıka boıynsha logıkalyq sıpattaǵy test tapsyrmalary ázirlenip, bıyl árbir nusqaǵa 1 tapsyrmadan engiziledi. Jańa test tapsyrmalaryn ázirleý jáne olardy saraptamadan ótkizý úshin 166 mektep muǵalimi tartyldy. Olardyń barlyǵyn óńirlik bilim basqarmalary usyndy jáne bul ustazdardyń barlyǵy úlken tájirıbeleri bar bilikti mamandar.
