Bilim jáne ǵylym mınıstrliginiń atyna zań buzýshylyqtardy joıý týraly uıǵarym daıyndalyp jatyr - Ádilet mınıstrligi
ASTANA. Mamyrdyń 20-sy. QazAqparat /Rýslan Ǵabbasov/ - Bilim jáne ǵylym mınıstrliginiń atyna zań buzýshylyqtardy joıý týraly uıǵarym daıyndalyp jatyr.
Bul týraly búgin Astanada ótken brıfıngte Ádilet mınıstrliginiń resmı ókili Erbol Erimbetov málim etti, dep habarlaıdy QazAqparat.
Onyń sózine qaraǵanda, bıylǵy jylǵy sáýirde Bilim jáne ǵylym mınıstrligine júrgizilgen tekserýde 121 buıryqqa qatysty, Densaýlyq saqtaý mınıstrliginde 146 buıryqqa qatysty zańnamany buzýshylyq faktileri anyqtalǵan. «Máselen, Bilim jáne ǵylym mınıstrliginiń azamattardyń quqyqtaryna, bostandyqtary men mindetterine qatysty 6 normatıvtik-quqyqtyq akti resmı jarııalanbaǵan jáne tirkelmegen normatıvtik-quqyqtyq aktilerdiń zańdy kúshi bolmaıdy, ıaǵnı tıisinshe qoldanýǵa jatpaıdy», dedi resmı ókil.
«2006 jylǵy sáýir men 2010 jylǵy naýryz aralyǵyndaǵy kezeńde atalǵan mınıstrlik pen onyń komıtetteri zańdy buza otyryp, 80 normatıvtik-quqyqtyq aktini zańnamada belgilengen tártipte memlekettik tirkeýge usynbaǵan», dedi E. Erimbetov.
Onyń aıtýynsha, qazirgi ýaqytta Bilim jáne ǵylym mınıstrliginiń atyna zań buzýshylyqty joıý týraly uıǵarym daıyndalýda. Sonymen qatar Ádilet mınıstrliginiń tekserýinen keıin Densaýlyq saqtaý mınıstrligi 146 normatıvtik-quqyqtyq aktini qoldanystaǵy zańnamanyń talaptaryna sáıkestendirýde.
