Bilim jáne ǵylym mınıstrligin qaıta qurý qajet - akademık Ǵ.Esim
ASTANA. 11 aqpan. QazAqparat - Búginde biz bilim berý salasyndaǵy qaıta daıarlaý máselesin sheshpeıtin bolsaq, qaısy ustaz, qaısy shákirt ekenin aıyra almaı qalýymyz ábden múmkin. Búgin S.Seıfýllın atyndaǵy Qazaq agrotehnıkalyq ýnıversıtetiniń stýdentterine dáris oqyǵan QR Parlamenti Senatynyń depýtaty, akademık Ǵarıfolla Esim osy máseleni erekshe atap ótti.
Osy oraıda ǵalym jınalǵan qaýymǵa bir saýal qoıdy: «Aqparattyq júıege kim jaqyn? Men ba? Joq, álde meniń aldymda otyrǵan jas pa? Árıne, ol (jas shákirt - avt.). Eger ol aqparattyq júıege jaqyn bolsa, kimniń oıy ınnovatsııaǵa jaqyn bolady? Álbette, onyń oıy. Al, endi men oǵan qandaı aqyl aıtamyn?.. Meniń daıyndyǵym tómen bolsa, qaıtip dáris beremin? Sondyqtan «Qazaqstan - 2050» baǵdarlamasynda kórsetilgen qaıta daıarlaý bul - basty másele. Ustazdar úzdiksiz bilim alyp, jetilýi tıis. Áıtpese, búgingi shákirtter bizdiń ókshemizdi basyp keledi. Erteń qaısy ustaz, qaısy shákirt ekenin aıyra almaı qalýymyz ábden múmkin», - dep nalıdy Ǵ.Esim. Ǵalymnyń aıtýynsha, Bilim jáne ǵylym mınıstrligin qaıta quryp, júıesin ózgertpese, ol máseleni sheshý qıyn bolady. «Prezıdenttiń ózi aıtty. Búgingi ınnovatsııalyq oılaýǵa ákimshilik júıe kedergi jasap otyr. Demek, búgingi ákimshilik júıeni ózgertý qajet-aq», - deıdi ol.
«Máselen, men ózim baǵdarlamany («Qazaqstan - 2050» - avt.) oryndaýǵa daıyn emespin. Sebebi aǵylshyn tilin bilmeımin. Al ınnovatsııalyq jańalyqtar aǵylshyn tilinde taraıdy. Onyń barlyǵy orysshaǵa aýdarylyp, maǵan jetkenshe, kesh bolyp qalmaı ma?! Árıne, kóshten keıin qalmas úshin meni qaıta daıarlaý qajet», - dedi Ǵ.Esim.
