Bilim jáne ǵylym mınıstrligi joǵary oqý oryndaryna qabyldaý erejesine ózgerister engizýdi qarastyryp jatyr
ASTANA. Qyrkúıektiń 9-y. QazAqparat /Qanat Mámetqazyuly/ - Bilim jáne ǵylym mınıstrligi joǵary oqý oryndaryna qabyldaý erejesine ózgerister engizýdi qarastyryp jatyr. Bul týraly búgin QR Parlamenti Senatynyń jalpy otyrysynda QR Bilim jáne ǵylym vıtse-mınıstri Mahmetǵalı Sarybekov málim etti.
Toqtala ketetin jaıt, «Qazaqstan Respýblıkasynyń keıbir zańnamalyq aktilerine otbasy úlgisindegi balalar aýyldary jáne jasóspirimder úıleri máseleleri boıynsha ózgerister men tolyqtyrýlar týraly» QR zań jobasyn talqylaý barysynda senator Sársenbaı Eńsegenov saılaýshylarmen kezdesýinde kóterilgen máselelerge toqtala kele, «Altyn belgi» ıelenýshi túlekterge qatysty saýal tastady. «Bıylǵy jyly mektepti «Altyn belgimen» bitirip, 115-ten joǵary ball jınaǵan túlekter qujattaryn elimizdiń birneshe JOO-laryna ártúrli mamandyqtarǵa tapsyrǵanyna qaramastan, olardyń grantqa ilinbeı qalý qaýpi týyndaǵan bolatyn. Osy turǵydan alǵanda oqýǵa qabyldaý kezinde deńgeıi birdeı úmitkerler arasyndaǵy konkýrsta qandaı ereje basshylyqqa alynatynyn bilgim keledi. Sosyn, keıingi jyldary «Altyn belginiń» qadiri túsip bara jatqandaı seziledi. Óıtkeni, keıbireýler mektepti on jyl boıy ortasha oqyp kelip, aqyrynda «altynǵa» ıe bolady», - degen senator mınıstrlik ókiliniń kózqarasyn surady.
Óz kezeginde bilim jáne ǵylym vıtse-mınıstri Mahmetǵalı Sarybekov depýtattyń pikirine kelisip, jyldan-jylǵa «Altyn belgini» ıelenýshiler sanynyń artyp otyrǵanyn jetkizdi. Máselen, vıtse-mınıstrdiń aıtýynsha, byltyr olardyń sany 1500 bolsa, bıyl 2400-ge jetipti. «Bul baǵyttaǵy máselemen mınıstrlik aınalysýda. Jalpy, kelesi jyldan bastap biz JOO-ǵa qabyldaý erejesine ózgerister engizý máselesin qarastyryp jatyrmyz. Qazir Úkimettiń tapsyrmasy boıynsha jumys komıssııasy quryldy», dedi M. Sarybekov.
