Bilim jáne ǵylym mınıstrligi jastar arasyndaǵy dinı ekstremızmniń aldyn alý jumystaryn kúsheıtýge kirispek
ASTANA. 20 qarasha. QazAqparat - Jastar arasyndaǵy dinı ekstremızmniń aldyn alý jumystary kúsheıtilmek. Bul týraly búgin Úkimet otyrysynan keıin QR Bilim jáne ǵylym mınıstri Baqytjan Jumaǵulov málim etti.
Tárbıe jumysyn kúsheıtý máselesine toqtalǵan mınıstr, bul baǵytta Oqytý úderisiniń tárbıelik komponentin kúsheıtý boıynsha úlgilik keshendi jospar qabyldanǵanyn, ol 2013 jyldan bastap iske asyrylatynyn atady.
Sonymen qatar vedomstvo basshysy Úkimet Oqýshylardyń fýnktsıonaldyq saýattylyǵyn damytý jónindegi 2012-2016 jyldarǵa arnalǵan ulttyq is-qımyl josparyn qabyldaǵanyn eske saldy.
«Biz jastar arasyndaǵy dinı ekstremızmniń aldyn alýǵa barynsha nazar aýdaramyz. Barlyq deńgeıdegi bilim berý uıymdarynyń basshylary úshin Din isteri agenttigi men Ulttyq qaýipsizdik komıtetiniń qatysýymen turaqty keńester ótkizemiz. Atalǵan jumystar budan ári kúsheıtiletin bolady»,-dedi B. Jumaǵulov.
Onyń sózine qaraǵanda, elimizde jastar uıymdarynyń sany ósýde. Olardyń qurylymy men shoǵyrlanýy ózekti bolyp otyr. Bul úderiste «Jas Otan», 10 iri respýblıkalyq jastar uıymy jáne «Jas Ulan» balalar men jasóspirimder uıymy mańyzdy oryn alady. «Jastar uıymdaryn shoǵyrlandyrý - jańadan qurylǵan Jastar isi komıtetiniń basty mindetteriniń biri»,-dep túıdi mınıstr.
