Bilim jáne ǵylym mınıstrligi otandyq ǵalymdardy kásibı merekelerimen quttyqtady
ASTANA. 12 sáýir. QazAqparat - Búgin - Ǵylym qyzmetkerleriniń kúni.
Osyǵan oraı, QR Bilim jáne ǵylym mınıstrligi otandyq ǵalymdardy kásibı merekelerimen quttyqtady.
«Qymbatty ǵalymdar! Qazaqstan Respýblıkasynyń Bilim jáne Ǵylym mınıstrligi Sizderdi tól merekelerińiz - Ǵylym qyzmetkerleriniń kúnimen quttyqtaıdy! Qazaqstan ǵalymdarynyń kásibı merekesi ulttyq jańa ǵylym júıesiniń qurylýyna negiz salǵan - «Ǵylym týraly» jańa Zańdy júzege asyrýdyń alǵashqy jylynyń aıaqtalýymen tuspa-tus kelip otyr.
Ǵylym salasyna qarjylandyrý men basqarýdyń jańa modeli engizildi. 2012 jyly salaǵa bólingen qarjy ótken jylmen salystyrǵanda 70 paıyzǵa ulǵaısa, 2015 jyly ǵylymǵa jumsalatyn qarjyny elimizdegi ishki jalpy ónimniń 1 paıyzyna, al 2020 jyly 1,5 paıyzyna jetkizý kózdelip otyr.
Elbasy ǵalymdar aldyna ǵylym jetistikterin ekonomıkalyq jáne áleýmettik taýarǵa aınaldyrý, ınnovatsııany damytý, irgeli zertteýlerdi álemdik deńgeıge kóterý sııaqty aýqymdy tapsyrmalar qoıdy. Bul baǵytta búginde birqatar jumystar atqarylýda. Qazaqstan ǵalymdary halyqaralyq deńgeıde ózderin senimdi kórsetip keledi. Ǵalymdarymyzdyń dúnıejúzilik moıyndalǵan ǵylymı basylymdardaǵy jarııalanymdary ósý ústinde.
Biz shyn máninde, Qazaqstanda tájirıbesi jas býynǵa úlgi bolarlyq, joǵary áleýetti, belgili ǵylymı mektepterdiń saqtalyp qalǵanyn maqtan tutamyz. Búgingi tańda zertteý jumystarynyń qyr-syryn meńgerip, jastar ǵylymǵa aǵylyp kele bastaýda.
Qurmetti ǵylym qyzmetkerleri! Qazaqstan ǵylymynyń bolashaǵy sizderdiń qoldaryńyzda. Sizderdiń bilimderińiz, tájirıbelerińiz, qarymdy azamattyq kózqarastaryńyz ǵylymda oılaǵandaryńyzdy júzege asyrýǵa, jetistikterge jetýge, bizdiń memleketimizdiń zııatkerlik áleýetin arttyrýǵa kómekteseri sózsiz. Sizderge baqyt, densaýlyq, sáttilik, shyǵarmashylyq oılaryńyzdy iske asyrýda tabystar tileımiz!», - delingen quttyqtaýda.
