Bilim jáne ǵylym mınıstrligi oqýshy zorlanǵan jekemenshik mektepti tekseredi

ALMATY. QazAqparat- Bilim jáne ǵylym mınıstrliginiń Balalardyń quqyqtaryn qorǵaý komıtetiniń tóraǵasy Esenǵazy Imanǵalıev pen balalar quqyqtary jónindegi shtattan tys keńesshi Raısa Sher «Marııam» jekemenshik mektebinde oqıtyn 1-synyp oqýshysyna qatysty mán-jaıdy zertteý úshin Almatyǵa keldi, dep habarlaıdy QazAqparat tilshisi.

Bilim jáne ǵylym mınıstrliginiń Balalar quqyǵyn qorǵaý komıtetiniń ókilderi atalǵan derek baqylaýda ekenin jetkizdi.

«Biz bul jaǵdaıdy erekshe baqylaýda ustap otyrmyz. Búgin profılaktıkalyq is-sharalardy júrgizý maqsatynda «Marııam» jekemenshik mekemesinde tekserý júrgizemiz. Sonymen qatar oqýshynyń otbasyna da baryp, qajetti kómek kórsetemiz. Balaǵa psıhologııalyq kómek kórsetiledi. Tergeýdiń qorytyndylaryna baılanysty sharalar qabyldanady. Saraptama nátıjesin kútý mańyzdy. Quqyq qorǵaý organdarymen baılanysta bolamyz», - dedi Balalar quqyǵyn qorǵaý komıtetiniń tóraǵasy Esenǵazy Imanǵalıev.

Buǵan deıin Almatyda 1-synyp oqýshysyn zorlaǵandarǵa qatysty is qozǵalǵany týraly jazǵan bolatynbyz.

Almaty qalalyq polıtsııa departamenti baspasóz qyzmeti osy oqıǵa boıynsha balanyń ákesi Naýryzbaı aýdandyq polıtsııa basqarmasyna 21 sáýirde aryzdanǵanyn jetkizdi.

Qazirgi ýaqytta tergeý júrgizilip jatyr, zorlyq-zombylyq áreketteriniń jasalǵanyn anyqtaý úshin saraptama taǵaıyndaldy.