Bilim jáne ǵylym mınıstrligi oqýlyqtardy jetkizýshilerge talapty kúsheıtýde

ASTANA. QazAqparat - Óńirlerde oqýlyq jetkizýshilerine talap kúsheıtildi. Búgin Májiliste «Oqýlyqtardyń sapasy jáne jalpy orta, tehnıkalyq jáne kásiptik bilim berý uıymdaryn oqýlyqtarmen qamtamasyz etý» atty taqyryptaǵy Úkimet saǵatynda Bilim jáne ǵylym mınıstri Aslan Sárinjipov osylaı málimdedi.

«Mektepterdi oqýlyqpen qamtamasyz etý protsesindegi osal tustyń biri - oqýlyqty mektepke deıin jetkizý. Osyǵan baılanysty mınıstrlik oqýlyqty óńirlerge jetkizýshilerge talapty kúsheıtip otyr. Atap aıtqanda, olarda arnaıy tehnıkalar, qoımalar, daıyndalǵan personaldar bolýy kerek. Oqý ádebıetterin jetkizý merzimderine de talaptar kúsheıtiledi», - dedi mınıstr A.Sárinjipov. Budan bólek, vedomstvo basshysy oqýlyqqa qosymsha qajettilikti naqty boljaýdyń mańyzdylyǵyn da atap ótti. Onyń sózine qaraǵanda, bundaı naqty boljaý mektep kitaphanalarynyń qoryn tolyqtyrýǵa septigin tıgizetin bolady. «Bul mindetti sheshý úshin mınıstrlik arnaıy nusqaýlyqtar ázirledi. Onda mektep kitaphanalaryn tolyqtyrý, olardy jańartý tetikteri qamtylyp, kitaphana qorlarynan eskirgen oqýlyqtardy alý jaılary da qarastyrylyp otyr», - dedi A.Sárinjipov.

Sondaı-aq, A. Sárinjipovtiń aıtýynsha, mektepti oqýlyqtarmen ýaqytyly ári tolyq qamtamasyz etpegeni úshin tıisti tulǵalar tártiptik jaýapkershilikke tartylady.

Mınıstr sóz arasynda elektrondyq oqytýdyq aqparatyq júıesi bazasynda kitaphana qorlaryn esepke alýdyń tehnıkalyq múmkindikteri qarastyrylyp jatqanyn jetkizdi. «Bul rette jergilikti atqarýshy organdarmen kitaphana qorlaryn ýaqytyly josparlaý, jańalaý jáne tolyqtyrý jumystary júrgizilýde. Sonymen qatar, mektepti oqylyqtarmen qamtamasyz etý protsesin bpaqylaý táýekeldi ýaqytyly anyqtap, sharalar qabyldaý úshin qajet», - dedi mınıstr. Onyń aıtýynsha, qazirgi kúni bilim berý mekemelerin oqýlyqtarmen qamtamasyz etý tetikteri jasalǵan. Onda qamtamasyz etý protsessteri reglamenttelip, atqarýshylar men onyń merzimderi aıqyndalǵan.

«Mektepterdi oqýlyqtarmen ýaqytyly ári tolyq qamtamasyz etpegeni úshin jaýapty tulǵalardyń jaýapkershiligi máselesi qoıylýda. Eger jetkizýshilerdiń kinásinen jospar oryndalmasa, olarǵa azamattyq-quqyqtyq jaýapkershilik bar. Múmkin bolatyn olqylyqtardy boldyrmaý úshin bilim berý salasyndaǵy baqylaý jónindegi departamentter jergilikti jerlerde ákimdiktermen baspa shyǵarýshylarymen kelisimsharttardyń oryndalýyna monıtorıng jasaıdy», - dedi Aslan Sárinjipov.