Bilim jáne ǵylym mınıstrligi mektep baǵdarlamasyna esirtkige qarsy baǵyttalǵan arnaıy kýrstar engizýi qajet - úılestirý keńesi
ASTANA. Jeltoqsannyń 9-y. QazAqparat /Aıdar Ospanalıev/ - Quqyq qorǵaý organdarynyń úılestirý keńesiniń otyrysynda esirtkimen baılanysty qylmystardyń jolyn kesý jáne oǵan balalar men jastardy tartýdyń aldyn alý baǵytynda tıisti sharalar qoldaný máselesi qaraldy. Bul rette Bilim jáne ǵylym mınıstrligine mektep baǵdarlamasyna esirtkige qarsy baǵyttalǵan arnaıy kýrstar engizý usynyldy.
Bul týraly búgin atalmysh otyrysta kóterilgen máselelerge baılanysty jýrnalıstermen suhbattasqan Bas prokýratýranyń resmı ókili Nurdáýlet Súıindikov málim etti, dep habarlaıdy QazAqparat.
Onyń sózine qaraǵanda, otyrysta sondaı-aq Mádenıet jáne aqparat, Týrızm jáne sport mınıstrlikterine esirtkiden saýyqtyrý sharalaryn tanymal sportshylar men qoǵam qaıratkerlerin paıdalana otyryp uıymdastyrý tapsyrylǵan. «Búgingi tańda esirtkige qumar azamattardy áleýmettik beıimdeý jumystary da kóńil bólýdi qajet etip otyr. Osyǵan qaraı Úkimet bekitken 2009-2011 jyldarǵa arnalǵan esirtki jáne ony taratýmen kúres týraly arnaıy baǵdarlamaǵa esirtki paıdalanýdan bas tartqan azamattardy qoǵamdyq ortaǵa beıimdeý jónindegi sharalar engizý usynyldy. Qoryta aıtqanda, búginde elimizde atalmysh indetpen kúreske baǵyttalǵan barlyq sharalar jolǵa qoıylǵan jáne arnaıy memlekettik baǵdarlama da bekitilgen. Sondaı-aq memlekette osy baǵytta uzaqmerzimdi strategııa da bar. Bul rette quqyq qorǵaý organdary men múddeli qurylymdardyń jáne úkimettik emes uıymdardyń basty mindetteri qolda bar múmkindikterdi tıimdi paıdalanyp, esirtki men ony taratýǵa qarsy turý bolyp otyr», dedi resmı ókil.
