Bilim jáne ǵylym mınıstrligi ІІ jartyjyldyqtyń mindetterin anyqtady
ASTANA. 6 shilde. QazAqparat - Pedagogtardyń biliktiligin rastaıtyn táýelsiz ortalyqty qurý ІІ jartyjyldyqtaǵy basymdyqty mindetterdiń biri bolyp tabylady, dep habarlady QR Bilim jáne ǵylym mınıstrliginiń baspasóz qyzmetinen pm.kz saıtyna.
«Elbasynyń Joldaýymen júktelgen mindetter men shetelderdiń bilim berý júıelerindegi damý úderisteri eskerile otyryp, elimizde Memlekettik baǵdarlamanyń barlyq baǵytyn turaqty jańartý jumystary júrgizilýde»,- delingen vedomstvo habarlamasynda.
Atap aıtqanda, ІІ jartyjyldyqta joǵary oqý oryndary túlekteriniń biliktilikterin rastaıtyn táýelsiz júıe qurý jumysy qolǵa alynady. Onyń aıasynda Pedagogtardyń biliktilikterin rastaıtyn táýelsiz ortalyqtyń jumysyn ilki rejımde iske qosý josparlanýda.
Oǵan qosa, elimizdiń 20 joǵary oqý ornynda úsh tilde sabaq beriletin arnaıy bólimder ashylady. Olar negizinen pedagogıkalyq, jaratylystaný-ǵylymı jáne tehnıkalyq beıindegi mamandyqtardy qamtıtyn bolady jáne bul bastamanyń maqsaty joǵary oqý oryndaryna kóptildik bilim berý júıesin engizý bolyp tabylady.
Sondaı-aq eýropalyq jınaqtaý jáne nesıelerdi qaıta esepteý júıesi (ESTS) boıynsha qazaqstandyq nesıelerdi qaıta esepteý modelin engizgen oqý oryndarynyń úlesi 29 paıyzdan 45 paıyzǵa jetkizilmek.
Jáne jańa oqý jylynda birqatar birim oshaqtarynyń qurylysyn aıaqtaý josparlanyp otyr. Atap aıtqanda, Oral qalasynda «Nazarbaev Zııatkerlik mektebiniń», sondaı-aq óńirlerde shaǵyn quramda mektepterge arnalǵan 28 resýrstyq ortalyqtyń ashylýy josparlanyp otyr. Al qarasha aıynda Astanada 800 orynǵa arnalǵan kásiptik lıtseıdiń qurylysy, jyldyń sońynda úsh aýysymda jumys isteıtin jáne apatty jaǵdaıdaǵy mektepterdiń ornyna salynyp jatqan 27 mekteptiń qurylystary aıaqtalady.
Mınıstrliktiń habarlaýynsha, sondaı-aq Almaty, Astana qalalary men 14 oblystyń mektepterine respýblıkalyq bıýdjettiń esebinen jańa modıfıkatsııadaǵy 569 hımııa kabınetterin satyp alý josparlanýda.
