Bilim jáne ǵylym mınıstri jýyq arada JOO-lar jelisin ońtaılandyrýdy tapsyrdy
ASTANA. 31 qańtar. QazAqparat /Jasulan Joldybaev/ - Ekonomıkany qajetsiz kadrlarmen toltyra bermes úshin joǵary oqý oryndarynyń jelisin ońtaılandyrý qajet.
Bul týraly búgin Bilim jáne ǵylym mınıstri B.Jumaǵulov vedomstvonyń keńeıtilgen alqa májilisinde málim etti.
«Bul - Elbasynyń tikeleı tapsyrmasy. Sondyqtan, jýyq arada mınıstrlik joǵary oqý oryndaryn jikteýdiń árbir satysyna jańa talaptar ázirleýi tıis. Bul talaptar ońtaılandyrýdyń negizi bolady. Osy rette qolda bar álemdik tájirıbeni paıdalaný qajet. Ol - Karnegı (AQSh) klassıfıkatsııasy, Eýropalyq odaq ýnıversıtetteriniń kartasy», - dep atap ótti mınıstr.
Vedomstvo basshysynyń aıtýynsha, qazirgi ýaqytta elimizde 147 joǵary oqý orny bar. Stýdentter sany 599 myń adamdy quraıdy.
Eger álemde orta eseppen 10 myń adamǵa 232 stýdentten kelse, bizde 377 stýdentten keledi. Bul kórsetkish boıynsha AQSh, Reseı jáne taǵy basqa birneshe elden keıingi álemdegi birinshi ondyqtamyz.
«Alaıda, Eýropadaǵy qaýipsizdik jáne yntymaqtastyq uıymynyń kóptegen damyǵan elderinde bul sandar bylaısha kórinis tapqan: Japonııada - 222, Germanııada - 258. Sondyqtan, ekonomıkany qajetsiz kadrlarmen toltyra bermes úshin joǵary oqý oryndarynyń jelisin ońtaılandyrý qajet», - dedi B. Jumaǵulov.
