Bilim jáne ǵylym mınıstri oqýlyqtyń baǵasy qymbat ekenin moıyndady
NUR-SULTAN. QazAqparat – QR Bilim jáne ǵylym mınıstri Ashat Aımaǵambetov oqýlyq baǵasynyń qymbat ekenin moıyndady, dep habarlaıdy QazAqparat tilshisi.
«Men oqýlyq baǵasyna arnaıy taldaý júrgizdim. Bizde bastaýysh synyptar bazalyq oqýlyq paıdalanady. Negizgi jáne joǵary synyptarǵa arnalǵan balama oqýlyqtar bar. Ekeýiniń baǵasyn salystyrdym. Bazalyq oqýlyqtardy basýǵa belgili bir baspalar múmkindik alyp otyrǵan. Sáıkesinshe, baǵasy joǵary bolǵan. Al balamasy bar oqýlyqtardy 4-5 baspa shyǵarǵan. Bul jerde mektepter ózine tıimdisin tańdaı alady. Osy báseke oqýlyq baǵasyna da áser etken. ıAǵnı, bazalyq oqýlyqtar balamasy bar oqýlyqtarǵa qaraǵanda qymbat ekenin kóremiz», - degen mınıstr qazirgi baǵaǵa kóńili tolmaıtynyn jetkizdi.
«Oqýlyq baǵasy boıynsha mınıstrliktiń ustanymy aıqyn. Ony eseptep shyqtyq. Qalamaqy tóleý kerektigin, bul bıznes ekenin túsinemiz. Sonda da, oqýlyq baǵasy qazirgideı qymbat bolmaýy kerek. Biz pikir almasýlar arqyly osyǵan kózderin jetkizýimiz kerek. ıAǵnı, baǵa saıasatynda mınıstrlik syrt qalmaýy kerek. Bizde buǵan deıin A4 qalypty jáne odan da kólemdi oqýlyqtar boldy. Endi elestetip kórińizder, birinshi synyp oqýshysy otyr deıik. Olardyń partalary shaǵyn bolady. Qasynda partalasy otyr. Jańaǵy kólemdi oqýlyqtar partaǵa syımaı, balany áýrege túsiredi. Bir qaraǵanda bul usaq-túıek másele sııaqty. Biraq balanyń bilim alýynda róli orasan. Munyń báriniń artynda bilim berý sapasy men tıimdiligi tur. Jalpy búgingi oqýlyqtardyń jaǵdaıyna kóńili tolmaıdy», - dedi ol.
Ashat Aımaǵambetov oqýlyq shyǵarý júıesine ózgeris engiziletinin atady.
«Salada júıeli máseleler bar. Oqýlyq daıyndaý, onyń sapasyn saraptaý, irikteý júıesine ózgeris engizetin bolamyz. Sondyqtan, endigi oqýlyq basý kezeńinde men barlyq baspalarǵa osy aıtylǵan máselelerdi eskerýdi tapsyramyn. Mundaı bassyzdyqtarǵa jol berip qoıa almaımyz. Naqty sheshimder qabyldap, júıeli jumys júrgizetin kez jetti», - dep túıindedi mınıstr.
