Bilim jáne ǵylym mınıstri elordanyń bilim berý nysandaryn aralap, jańa oqý jylyna daıyndyqtarymen tanysty
TANA. 5 tamyz. QazAqparat - Búgin QR Bilim jáne ǵylym mınıstri Baqytjan Jumaǵulov Astana qalasynyń bilim berý nysandaryn aralap, jańa oqý jyly qarsańynda mektepter men muǵalimderdiń daıyndyǵyn zerdeleý úshin elorda mektepteriniń, lıtseıleriniń, mektepke deıingi bilim berý mekemeleriniń basshylary men ujymymen kezdesti.
Bul aqparatty QR Bilim jáne ǵylym mınıstrliginiń baspasóz qyzmeti taratyp otyr.
Mınıstr jumys sapary barysynda jańadan salynyp jatqan Oqýshylar saraıynda bolyp, biregeı jobanyń tujyrymdamasymen tanysty. Oqýshylar saraıy - planetarıi, kishi observatorııasy, murajaıy, tennıs alańy, muz aıdyny, horeografııalyq, jeńil atletıkalyq maneji, basseıni, qysqy baýbaqshasy jáne taǵy basqa da nysannan turatyn tolyqqandy qalashyq. Onda kemtar balalar erkin júre alatyndaı barlyq qajetti jaǵdaılar qarastyrylǵan. Mınıstr qurlystyń barysymen tanysý úshin bolashaq keshenniń barlyq qurylys alańdaryn aralap shyqty.
Sondaı-aq B.Jumaǵulov «Ásemaı» balabaqshasynda boldy. «Balapan» baǵdarlamasynyń aıasynda ashylǵan bul jańa mektepke deıingi mekeme qyrkúıek aıynda 240 balaǵa esigin aıqara ashady. Mınıstr Elbasynyń bul baǵdarlamasyn iske asyrý barysyn erekshe baqylaýda ustap jáne oǵan úlken belsendilik tanytý qajet ekenin atap aıtty.
Mınıstr «Hailebury Astana» halyqaralyq mektep-ınternatynyń jańa oqý jylǵa tolyq daıyndyǵyn da kórdi. Mektep dırektory Endrıý Osterdiń aıtýynsha, qurylys aıaqtaldy jáne mektep-ınternat birinshi oqý jylynda 320-ǵa jýyq oqýshyny qabyldaýǵa daıyn.
Aldaǵy oqý jylynda № 66 jańa mektep te oqýshylar úshin esigin aıqara ashpaq. Qazirgi zamanǵy mektep elektrondy qaýipsizdik júıesimen, «3D - zerthana» formatyndaǵy kabınetpen, úsh ınformatıka kabınetimen, kitaphana men sporttyq qurylymdarmen qamtylǵan. Mektep 1200 oqýshyny qabyldaýǵa daıyn.
