Bilim jáne ǵylym mınıstri B.Jumaǵulov ÚEU ókilderimen kezdesti
dep habarlady mınıstrliktiń baspasóz qyzmetinen.
Bilim salasynyń ÚEU-nyń qoldaýy qajet ekendigin atap ótken mınıstrdiń pikirinshe, qoǵamda muǵalim bedeliniń tómendigi týraly árqıly pikirler qalyptasyp kele jatyr. Osy syndy pikirlerdi birjaqty qalyptastyrý úshin memleket, otbasy jáne qoǵamnyń kúsh-jigerin biriktirip, barlyq aýyrtpalyqty jumyla kóterý qajet. Memleket osy mindetti oryndaýǵa kirisip te ketti. Oqytýshylardyń jalaqysy josparly túrde ósýde, kategorııalary úshin ústemaqylar tólenýde, muǵalimderdiń biliktiligin arttyrý úshin josparly baǵdarlama júzege asyrylýda. Endigi kezekte ata-ana men qoǵamnyń ortaq iske jumylýy qajet. Oǵan birden bir dáneker bolatyn úkimettik emes uıymdar bolyp tabylady.
Kezdesý barysynda ashyq áńgime alańy quryldy. Mınıstrlik basshysy kúrmeýli suraqtarǵa jaýap berdi. Mysaly, mektepterdegi árqıly alym-salyqtarǵa toqtap ótip, osy baǵytta birqatar máselelerdiń oń sheshim tabatynyn atap aıtty. Endigi kezekte bul másele tek jergilikti organdardyń ǵana baqylaýynda emes, mınıstrliktiń aımaqtyq bilim berý qyzmeti sapasyn baqylaý departamentteri de jiti qadaǵalaıtyn bolady.
Mınıstrdiń oń bastamasyn jyly yqylaspen qabyldaǵan uıym ókilderi bilim salasyndaǵy óz bastamalarymen bólisti. Máselen, mekteptegi psıholog mamandardyń jetispeýshiligi, balalar uıymdary men mektep saıttaryn ashý, jastardy ǵylymǵa baǵyttaý, qaıyrymdylyq jáne volonterlik qyzmetti jetildirý, ınklıýzıvti bilim berýdegi ata-analarǵa arnalǵan trenıngter uıymdastyrý sııaqty birqatar máseleler talqylandy.
Mınıstrliktiń bilim berý, tárbıeleý, balalardyń quqyqtaryn qorǵaý salasynda jumys isteıtin ÚEU-men birigip, forým ótkizý usynysy kelisim tapty. Sonymen qatar, mınıstrlik basshysy osyndaı kezdesýdiń nátıjesinde memlekettik baǵdarlamany júzege asyrýda, bilimniń sapasyn arttyrýda birden bir qolǵanat bolar ÚEU qoǵamdyq keńesi qurylý qajettigin atap aıtty.
