Bilim jáne ǵylym mınıstri aqmolalyq pedagogtarmen kezdesti
KÓKShETAÝ. QazAqparat - QR Bilim jáne ǵylym mınıstri Erlan Saǵadıev Aqmola oblysynyń pedagogtaryna Joldaýda aıtylǵan mindetterdi túsindirdi, dep habarlaıdy «QazAqparat» HAA tilshisi.
Elbasy Nursultan Nazarbaevtyń Joldaýynda aıtylǵan negizgi basymdyqtardy túsindirý maqsatynda Aqmola oblysyna kelgen aqparattyq-nasıhat tobynyń múshesi QR Bilim jáne ǵylym mınıstri Erlan Saǵadıev Kókshetaýda oblystyń ár óńirinen jınalǵan 80-nen astam ustazben kezdesti.
Kezdesýde mınıstr UBT formatynyń ózgerýine baılanysty ótken jyly 17 myń túlektiń joǵary bilim alýyna múmkindik alǵanyn atap ótti. Sonymen qatar, bıylǵy jyly da JOO bólinetin granttyn kólemin arttyrý kózdelgeni sóz boldy.
«Bakavalarıatqa bólinetin granttyń kólemin 31 myńnan 36 myńǵa deıin, magıstranttar 7 myńnan 10 myńǵa deıin jáne PhD eki esege deıin ulǵaıady», dedi mınıstr.
Sonymen qatar, Erlan Saǵadıev ótken jyly elimiz boıynsha barlyǵy 75 myń muǵaliminiń jańa mazmun boıynsha oqyǵanyn aıtty. «Elektrondy kúndelik» júıesi elimizdegi mektepterdiń 50 paıyzyna engizilip otyr. Jańa júıe muǵalimderge «onlaın» rejımde baǵa qoıýǵa, ata-analarǵa balalarynyń úlgerimin baqylaýǵa múmkindik bermek. Qazirdiń ózinde elimizde 770 myń ata-ana osy júıeni paıdalanady.
