Bilim jáne Densaýlyq saqtaý mınıstrlikteri Nur Otan keńesinde oflaın oqýǵa oralý jaıyn talqylady
Keńes tóraǵasy, Parlament Májilisiniń depýtaty Juldyz Súleımenova búginde bilim berý salasyndaǵy basym mindetterdiń biri – oflaın oqýǵa oralý ekenin, biraq ol barlyq sanıtarlyq-epıdemıologııalyq talaptardy qatań saqtaı otyryp oryndalýy tıistigin atap ótti.
Májilis barysynda Bas memlekettik sanıtarlyq dáriger Erlan Qııasov habarlaǵandaı, pedagogtar men qyzmetkerlerdi 100% vaktsınalaýmen qamtamasyz etkende ǵana mektepter dástúrli oqytý formatyna kóshe alady.
«Mektepterdegi saqtyq sharalary buqaralyq is-sharalardy ótkizýge tyıym salýdy, synyptardy bólýdi jáne ártúrli synyptar úshin úzilis ýaqytyn bólýdi, ashanada tamaqtaný barysyna baqylaýdy kúsheıtýdi qamtıdy. Joǵary oqý oryndaryna kelsek, 18 jastan asqan stýdentter de vaktsınalanýy nemese qashyqtan oqytýǵa aýystyrylýy tıis», – dedi Erlan Qııasov.
Keńes múshesi, «Respýblıkalyq fızıka-matematıka mektebi» KEAQ basqarma tóraǵasy Ǵabıt Bekahmetov oqýshylardy bastaýysh, orta jáne joǵary mektep bloktaryna bólýdi usyndy. Koronavırýs anyqtalǵan jaǵdaıda, karantınge búkil mektep emes, naqty blok jabylady.
«Bilim berý mekemeleriniń basshylaryna oqýshylardy fızıkalyq túrde bólýge qatysty naqty usynystar berý qajet. Máselen, olardyń úziliske shyǵatyn ýaqyty ǵana emes, ár blokta sabaq bastalatyn jáne aıaqtalatyn ýaqyt ta ártúrli bolǵany jón», – dedi Ǵabıt Bekahmetov.
Keńes múshesi, Almaty memlekettik energetıka jáne elektrondyq tehnologııalar kolledjiniń dırektory Tóleýǵalı Taıtýleev qoǵamdyq kólikterde baqylaýdy kúsheıtý qajet dep sanaıdy. Sebebi, oqýshylar men pedagogtar vırýsty naq osy qoǵamydyq kólikterde juqtyrý qaýpi joǵary.
Óz kezeginde Bilim jáne ǵylym vıtse-mınıstri Sholpan Karınova 1 qyrkúıekten bastap elimizde 7 475 mektepti ashý josparlanyp otyrǵanyn jetkizdi. Sondaı-aq, ol «Nur Otan» partııasynyń saılaýaldy baǵdarlamasyn oryndaýǵa arnalǵan Jol kartasy aıasynda bıyl 200 mektep salý jáne 1 000 mektepti jańartý mindeti turǵanyn atap ótti.
«289 mekemege kúrdeli jóndeý júrgizý, birqatar mektepterde jıhazdardy jańartý, jańa pándik synyptardy ashý, kitaphanalar men ashanalardy jańǵyrtý josparlanǵan», – dedi Sholpan Karınova.
Otyrys qorytyndysy boıynsha Bilim jáne ǵylym mınıstrligine oqýshylardyń uzaq ýaqyt onlaın formatta oqýyna baılanysty oryn alǵan olqylyqtardy taldaý jáne olardyń ornyn toltyrý úshin keshendi baǵdarlama qabyldaýǵa qatysty birqatar usynymdar ázirlendi. Sonymen qatar, Keńes músheleri pedagogtardyń tapshylyǵyn tehnıkalyq mamandardy tartý arqyly sheshýdi usyndy.
