Bilim vıtse-mınıstri ózine taǵylǵan aıypqa qatysty pikir bildirdi
«Buǵan deıin birqatar BAQ-ta meni jáne áriptesterimdi sybaılas jemqorlyqqa jáne laýazymyn teris maqsatta paıdalandy dep aıyptaǵan aqparat paıda bolǵan. Memlekettik qyzmet týraly Zańnyń 52-babyna sáıkes, memlekettik qyzmetshige kópshilik aldynda negizsiz aıyp taǵylǵan jaǵdaıda, ol mundaı aıyp taǵylǵan kúnnen bastap bir aı merzimde teriske shyǵarý jóninde sharalar qoldanylýy tıis. Maǵan baǵyttalǵan tekserý aıaqtaldy (qujatty qosa salyp otyrmyn). Sáıkesinshe, A. Qaıyrbekovanyń maǵan taqqan aıyptarynyń bári negizsiz», - deıdi vıtse-mınıstr.
Rústem Bıǵarı óz jazbasynda oqıǵanyń qalaı órbigenin qaıtadan eske alyp, óziniń bul laýazymǵa ornalasqan kúnnen bastap qandaı oqıǵalardy bastan ótkergenin baıandaǵan.
«Sol kezde biz kemshilikterdi joıý jáne aqparattyq qaýipsizdik talaptaryn qamtamasyz etý úshin UBDB synaǵynan ótý sııaqty tez, tıimdi jáne shyǵynsyz (málimdelgen 89 mln teńge eki ese qysqartyldy) taldaý júrgizdik. Muny isteý óte mańyzdy boldy, óıtkeni ODB-da eldegi barlyq balalar týraly derbes derekter saqtalǵan jáne ol bógde qoldarǵa túsýi múmkin edi. Sonymen, jospar daıyndalyp, 2018 jyldyń qyrkúıek aıynda ákimshilik jumys jáne memlekettik satyp alý departamentine tapsyryldy. Alaıda, departament talap ústine talap qosyp, rásimdi soza tústi», - dep jazdy ol.
Mınıstrlik ókili bul aıyptaýdy «medıbopsa» dep atap, óziniń qyzmettegi áreketi keıbireýlerge tıimsiz bolǵan degen boljam jasaıdy.
«Múmkin, keıbireýlerge avtomattandyrý protsesteri men bilim berý júıesindegi ashyqtyq tıimsiz shyǵar. Bul «medıabopsany» jarııalaýǵa BAQ ókilderiniń asyqpaǵanyn atap ótkim keledi», - dep jazdy vıtse-mınıstr.
Eske salsaq, Rústem Aıdarbekuly Bıǵarı 2018 maýsymda QR Bilim jáne ǵylym vıtse-mınıstri laýazymyna taǵaıyndalǵan bolatyn.