Bilim vıtse-mınıstri 1-synyp oqýshylaryna Prezıdent atynan syılyq tabystady (FOTO)
ASTANA. QazAqparat - Elordada búgin 500-ge tarta oqýshy jańadan ashylǵan №77 mektep-gımnazııasynyń tabaldyryǵyn attady. Bul balalardyń ishinde 200 oqýshy úshin búgin alǵashqy qońyraý soǵyldy, olar - álippe betin alǵash ashyp otyrǵan búldirshinder.
Jańa bilim oshaǵynyń ashylýyna QR Bilim jáne ǵylym vıtse-mınıstri Takır Balyqbaev qatysyp, oqýlarynda tabys tiledi.
"Búgin - Bilim kúni, óte mereıli mereke. Bilim kúninde jańa mektepter ashylyp jatyr. Sonyń biri - mine, sender tabaldyryǵyn attaǵan №77 mektep-gımnazııasy. Bul mektep 1200 balaǵa arnalǵan jáne qazaq tilinde bilim beredi. Ana tilimiz ben aǵylshyn tilin tereńdetip oqytady. Jańa oqý jylynda jańa mektepte bilimderińdi ushtaı berińder, búldirshinder", - dedi T.Balyqbaev óz quttyqtaýynda.
Esterińizge sala keteıik, bıyl 1-synypqa barǵan barlyq oqýshylarǵa QR Prezıdenti atynan syı jasalady. Vıtse-mınıstr de jańa ashylǵan mekteptiń birinshi synybyna barǵan 168 balaǵa Prezıdent atynan Elbasynyń "Meniń Otanym - Qazaqstan" atty kitapty tabys etti.
"Elbasynyń bul kitaby bilim álemin endi tanıtyn búldirshinge óz eli, óz Otany týraly bárin aıtyp beredi. Bul - baǵasy qymbat syılyq. Endi árip tanyǵan bala osy kitapty oqı otyryp, týǵan jerin baǵalaýdy úırenedi", - dep atap ótti T.Balyqbaev.
Aıta keteıik, bıyl elimiz boıynsha 157 mektep jańadan salynsa, onyń 84-i Bilim kúninde ashylyp otyr.
