Bilim uıymdaryna terrorızmge qarsy qorǵanysta qoıylatyn jańa talaptar bekitildi
«QR Úkimetiniń 2021 jylǵy 6 mamyrdaǵy qaýlysymen nysandardy terrorızmge qarsy qorǵanysqa qoıylatyn jańa talaptar bekitildi. Bul talaptar keshe kúshine endi. Árbir bilim berý uıymyna qoıylatyn eki talap bar: negizgi jáne qosymsha. Árbir bilim berý uıymy osy qaýlyda kórsetilgen negizgi talaptardy oryndalýyn qamtamasyz etýi tıis. Negizgi talapqa beınebaqylaý júıesi, dybystyq habarlandyrý júıesi, dabyl berý túımesiniń bolýy kiredi. Qosymsha talapqa tehnıkalyq tekserý quraldary, baqylaý júıesi, kúzet dabylynyń bolýy jatady», - dedi Maıra Meldebekova mınıstrliktiń apparat jınalysynda.
Onyń atap ótýinshe, terrorızmge qarsy qorǵanysty uıymdastyrý nusqaýlyǵy da atalǵan qaýlyda kórsetilgen. Olarǵa ruqsat arqyly ótkizý rejımin, terrorıstik sıpattaǵy kórinisterge qarsy is-qımyldardy uıymdastyrý, terrorızmge qarsy qorǵanys pasportyn ázirleý, nysandardy tehnıkalyq jabdyqtaý kiredi.
«Beınebaqylaý júıesimen jabdyqtaý standarttary men talaptary Bilim jáne ǵylym mınıstrligi men Іshki ister mınıstrliginiń birlesken buıryǵymen bekitilgen. Negizgi talaptar: árbir beınebaqylaýdyń bir jáne odan kóbirek jazý rejıminiń bolýy, muraǵattan joıý jáne ózgertýden qorǵalýy, beınejazbany naqty ýaqyt rejımde berip otyrý múmkindigi, beıneni bir ýaqytta birneshe kamerada muraǵattan qaraý múmkindiginiń bolýy, elektr energııasy sóngen jaǵdaıda da kameralarynyń úzdik jumys isteýi», - dedi ol.
