Bilim uıymdaryn attestattaýda qaýipsizdik basty talap bolady – mınıstr

NUR-SULTAN. QazAqparat – Bilim berý uıymdaryn attestattaý barysynda olardyń qaýipsizdigi basty talaptardyń biri bolady. Bul týraly QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat tilshisi.

«Balalardyń qaýipsizdigi eń basty másele. Ata-analar balalaryn balabaqshaǵa ne mektepke jibergende alańdamaýy kerek. Olarǵa qatysty qaýipsizdik is-sharalary tolyǵymen qabyldanyp, jaıly orta qalyptastyrýymyz qajet. Ol úshin tıisti jumysty uıymdastyrý kerek. Qazan qalasynda bolǵan jantúrshigerlik oqıǵa bárimizdiń qabyrǵamyzdy qaıystyrdy. Bul biz úshin úlken sabaq bolýy tıis. Sondyqtan biz bilim salasynda tıisti, keshendi, júıeli is-sharalar qabyldaýymyz kerek», - dedi ol vedomstvonyń apparat jınalysynda.

Onyń atap ótýinshe, mektepterde dabyl túımeleri, beınebaqylaý júıeleri, metall izdeýge arnalǵan qurylǵylar ornatylyp, arnaýly kúzet qyzmeti bolýy qajet.

«Qazan qalasynda oryn alǵa oqıǵa bizge taǵy bir óte mańyzdy jaıtty kórsetti. Bul muǵalimderdiń, balalardyń, jalpy mektep qyzmetkerleriniń osyndaı ártúrli jaǵdaıda ózin ustaý máselesine qatysty. Ne isteý kerek? Qandaı eń alǵashqy is-sharalar jasaý kerek? Mysaly, halyqaralyq akkredıtatsııa júıesin qarasaq, eń birinshi qaýipsizdik máselesi qaralady. «Jaman aıtpaı jaqsy joq» demekshi, osyndaı ártúrli jaǵdaılarǵa tótep beretindeı daıyn bolýymyz kerek. Endi akkredıtteý talaptaryna osy máseleler qosylady. Balabaqshalardyń, mektepterdiń, kolledjderdiń attestatsııasy kezinde qarastyrylatyn eń basty máselelerdiń biri qaýipsizdigi bolady. Sony reglamentke kóshirip, engizip jatyrmyz», - dedi Ashat Aımaǵambetov.