«Bilim» telearnasyna bir jyl! VIDEO
ASTANA. 5 qyrkúıek. QazAqparat - Qazaqtandyq tuńǵysh aǵartý arnasy alǵashqy týǵan kúnin toılaýda. Ótken jyl arna úshin kóp synaqqa toly boldy: kásibı mamandar ujymyn jınap, otandyq televıdenıedegi ózindik kontentin qurdy, dep habarlady «Habar» agenttiginiń baspasóz qyzmetinen.
«Bilim» telearnasy «Habar» teleotbasysynyń quramyna kiredi. Arnanyń negizgi ustanymy - qıyndy jeńildetip, ońtaıly tásilder arqyly usyný. «Bilim» «education» (bilim) jáne «entertainment» (oıyn-saýyq) degen eki sózden turatyn «edutainment» formatyn tańdap alǵan, ıaǵnı tanymdyq baǵdarlamalardyń kóp bóligi oıyn-saýyqtyq, jeńil nusqada beriledi.
Arnanyń shymyldyǵy ashylǵan mezetten 700 saǵattan asa tanymdyq, ǵylymı baǵdarlamalardyń alǵashqy kórsetilimi boldy, 2000-nan astam saǵat BBC, Discovery, National Geographic, History usynǵan derekti fılmder men telehıkaıalary efırge shyqty. Baǵdarlamalar túsirilimine 2000-nan asa oqýshylar, 1300 stýdentter, 300-ge jýyq muǵalimder men 120-daı ǵylym salasynyń maıtalmandary qatysty. Arna qazaq, orys, aǵylshyn tilderinde habar taratady, onyń 55 % jýyǵy memlekettik tilde.
«Biz bilim habarshylarymyz, - deıdi óz sózinde «Bilim» arnasynyń dırektory Ǵazıza Japparova. - Jan-jaǵymyzǵa nazar salyp qarasaq, bilýge umtylǵan, ǵylymǵa talpynǵan, jańa jańashyldyqtardy boıyna sińirýge asyq jandardy kóptep keziktiremiz. Olar jas jaǵynan da ártúrli, jastardy da, egde jastaǵy kisilerdi de keziktiremiz. Qazirgi kezde tanymdyq baǵyttaǵy oıyn-saýyqtyq baǵdarlamalardyń bedeli artýda. Ótken jyl bizdiń ujym úshin óte aýyr boldy. Biz jaǵa formattardy izdedik, prodakshn-stýdııalarmen birlese otyryp baǵdarlamalar sapasyn joǵarylatý maqsatynda kóptegen zertteý jumystaryn júrgizdik. Atqaratyn jumys áli óte kóp. Ony iske asyrý - aldyǵa qoıǵan basty maqsatymyz».
Telearna búginde jańa maýsymǵa qyzý daıyndyq ústinde. Óziniń bir jyldyq týǵan kúnine oraı «Bilim» birneshe qyzyqty jobalardy ázirleý ústinde, solardyń biri - «Qazaqtyń sándik-qoldanbaly óneri», «Morgan Frımenmen ýaqyt pen keńistiń tylsymyna boılaý».
«Bilim» arnasy qoǵam úshin qajetti resýrs ekendigin dáleldedi, - deıdi Bilim vıtse-mınıstri Murat Ábenov óz sózinde. - Arnanyń ónimderi ártúrli janrlardy qamtıdy. Ony otbasylyq arna desek te bolady, sebebi kóptegen baǵdarlamalardy balalar ata-anasymen birge kóre alady. Arnanyń ulttyq dástúrlerimizdi dáriptep, kórermenin adamgershilik turǵyda tárbıeleıtini bir tóbe. Bir atap óterligi, sana-sezim arqyly, oıyn-saýyq negizindegi aqparat taratý men bilim berý - óte tıimdi ádis. Osylaısha mektepte alǵan bilim kórneki materıaldar arqyly nyǵaıa túspek. Bázbireýler keıbir kúrdeli tájirıbelerdi jasaı almaýy múmkin, alys shetelderge saıahattaı almaıtyny ras, munyń bárin «Bilim» arnasy kórsetedi. Telearnanyń damýyna, qyzyqty jobalardyń kóp bolýyna tilektespin!»
«Bilim» arnasynyń tabystary bizdi de qýantady, budan bir jyl buryn «Nazarbaev Ýnıversıtetiniń» qabyrǵasynda Elbasy alǵashqy bilim berý arnasynyń tusaýyn kesti. Bir jyl ishinde arna damyp, sapaly kórsetkishterge qol jetkizip otyr. Ýnıversıtetimizdiń arnadaǵy baǵdarlamalardy jasaýǵa úles qosatynyna qýanyshtymyz», - dedi «Nazarbaev Ýnıversıtetiniń» rektory Shıgeo Katsý.
«Arnanyń barlyq qyzmetkerlerine shyǵarmashylyq tabys, otandyq oqýshylar qaýymyn qyzyqtyratyn tyń ıdeıalar men jeńister tileımiz», - dep quttyqtady arna ujymyn orys tili páninen respýblıkalyq olımpıada jeńimpazy Aıdana Sapýan.
Esterińizge sala keteıik, «Bilim» arnasy sandyq formatta habar taratýdyń ulttyq baǵdarlamasy aıasynda quryldy. Bilim berý arnasynyń basty maqsaty - aǵartý, ǵylymdy nasıhattaý jáne daryndy jastardy joǵary oqý oryndary men ǵylymnyń bolashaǵy zor salalaryna tartý. Arna 2012 jyldyń 5 qyrkúıeginde Nazarbaev Ýnıversıtetinde ótken Elbasynyń ınteraktıvti lektsııasymen ashyldy.
