«Bilim» telearnasy TED lektsııalarynyń kórsetilimin bastady
ASTANA. 10 jeltoqsan. QazAqparat - «Bilim» telearnasy TED lektsııalarynyń kórsetilimin bastady. Osyǵan baılanysty erteń, 11 jeltoqsanda «Qazmedıa» ortalyǵynda TED lektsııalaryna baılanysty baspasóz máslıhaty ótedi, dep habarlady "WikiBilim" qoǵamdyq qory.
Baspasóz máslıhatyna «Habar Agenttigi» AQ «Bilim» telearnasynyń dırektory Ǵazıza Japparova, "WikiBilim" qoǵamdyq qorynyń jetekshisi Raýan Kenjehanuly qatysady.
TED ( Technology Entertainment Design degenniń aǵylshynsha abbrevıatýrasy, ony «Ǵylym, Óner, Mádenıet» dep aýdarýǵa bolady) - biregeı ıdeıalardy taratýdy («ideas worth spreading») maqsat tutqan, jyl saıyn konferentsııalar uıymdastyrýmen aınalysatyn halyqaralyq kommertsııalyq emes qor. Konferentsııanyń «Taratýǵa turarlyq ıdeıalar» dep atalatyn slogany aıtyp turǵandaı, konferentsııanyń basty maqsaty - múmkindiginshe kóp adamdarǵa qyzyqty ıdeıalardy jetkizý.
Ár jyldary Bıll Geıts, El Gor, Gordon Braýn, Bıll Klınton, Nobel syılyǵynyń ıegerleri Djeıms Ýotson men Mıýrreı Gell-mann jáne Vıkıpedıanyń negizin qalaýshy Djımmı Ýeıls sekildi tanymal tulǵalar TED-te sóz sóılegen. Barlyq lektsııalar konferentsııanyń www.TED.com saıtyna ornalastyrylady. Osy beınebaıandar jylyna 500 mıllıon ret qaralady.
