Bilim sapasyn jáne ýnıversıtet qyzmetin retteýdiń absolıýtti júıesi joq - QS halyqaralyq reıtıng agenttiginiń aımaqtyq dırektory
ALMATY. 26 qazan. QazAqparat - Ýnıversıtet qyzmetiniń ártúrli qyryn salystyryp, baǵalaǵanmen eshbir reıtıng agenttigi onyń jarqyn bolashaǵyn qamtamasyz ete almaıdy.
Bul týraly Almatyda ótken «Ortalyq Azııadaǵy joǵary bilim berýdiń damýy: sapany qamtamasyz etýdiń, aqparattyń jáne saralaýdyń mańyzy» dep atalatyn aımaqtyq forýmda aıtyldy.
«Reıtıng agenttikteriniń qyzmeti alǵash qalyptasqan kezde de synalǵan, qazir de synalady. Óıtkeni bilim sapasyn ólsheýdiń, ýnıversıtet qyzmetin retteýdiń absolıýtti júıesi joq. Árbir reıtıng óziniń jeke mindetterin sheshedi. Sondyqtan reıtıng agenttikteriniń baǵalaýyna kirýge muqııat bolý kerek. Bul ýnıversıtet qyzmetiniń negizgi mindeti emes. Olardyń basty mindeti - ǵylymı-zertteý jumystary arqyly eldi odan ary órkendetetin jas býyndy daıyndaý», - deıdi QS (Quacquarelly Symond) halyqaralyq reıtıng agenttiginiń Ortalyq Eýropa jáne Ortalyq Azııadaǵy aımaqtyq dırektory Zoıa Zaıtseva. Onyń aıtýynsha, reıtıng ýnıversıtet qyzmetiniń bir ólshemi. Ókinishke oraı qazaqstandyq joǵary oqý oryndary ózin-ózi nasıhattaýǵa salǵyrt qaraıdy. Sheteldikter bul týraly qazir resmı aqparat kózderine qaraǵanda «Bolashaq» baǵdarlamasynyń qatysýshylarynan kóbirek estip-bilýde.
