Bilim sapasyn kóterý úshin muǵalimge jaǵdaı jasaýymyz kerek – Berdibek Saparbaev
NUR-SULTAN. QazAqparat – Erteń Senattyń jalpy otyrysynda «Pedagog mártebesi týraly» zań jobasy qabyldanýy múmkin. Bul týraly búgin Úkimet úıindegi baspasóz máslıhatynda QR Premer-Mınıstriniń orynbasary Berdibek Saparbaev aıtty, dep habarlaıdy QazAqparat tilshisi.
«Memleket basshysynyń bergen tapsyrmasy bar. Eń negizgisi biz bilimniń sapasyn kóterýimiz kerek. Ol úshin birinshiden, muǵalimderge jaǵdaı jasaýymyz kerek. Ekinshiden, bilim salasynyń materıaldyq-tehnıkalyq bazasyn nyǵaıtýymyz qajet. Al ol úshin qazirgi tańda 2020-2025 jyldarǵa arnalǵan memlekettik baǵdarlama Úkimet tarapynan bekitildi», - dedi ol.
Premer-Mınıstr orynbasarynyń aıtýynsha, muǵalimderdiń jalaqysy qańtar aıynan bastap orta esepen 25-30 paıyzǵa ósedi. 4 jyldyń ishinde 2,5 ese artady. Al Úkimet qabyldaǵan, bekitken baǵdarlamanyń arqasynda mektepke deıingi jastaǵy balalar balabaqshamen 100 paıyz qamtylady. 2025 jylǵa deıin úsh aýysymdy, apatty jaǵdaıdaǵy mektepterdiń barlyǵy joıylady. Mektepter 100 paıyz ınternetpen qamtamasyz etilip, ınternattar ashylady, qosymsha sport zaldar salynady.
«Ózderińiz bilesizder, qazir Senatta muǵalimderdiń mártebesi jónindegi zań jobasy qaralyp jatyr. Bizdiń josparymyz boıynsha erteńgi otyrysta ol qabyldanatyn shyǵar. Odan keıin Memleket basshysynyń qol qoıýyna jiberiledi», - dedi Berdibek Saparbaev.
