Bilim salasynyń ardagerleri Úkimetke aryzdandy
ASTANA. QazAqparat - «Nur Otan» fraktsııasy Úkimet basshysy Baqytjan Saǵyntaevtyń atyna depýtattyq saýal joldady, dep habarlaıdy QazAqparat tilshisi.
Depýtat Beıbit Mamraevtyń aıtýynsha, Parlament Májilisine kásiptik-tehnıkalyq bilim salasynyń ardagerleri men jumys berýshilerden úndeý tústi. Sonyń negizinde Úkimet basshysynyń atyna depýtattyq saýal ázirlendi.
«Olar bilim jáne ǵylym mınıstrliginiń sheshimine alańdap otyr. Atalǵan memorgan kásiptik-tehnıkalyq bilim boıynsha memlekettik standarttardan jalpy bilim berý pánderin alyp tastaýdy josparlap otyr. Sonyń saldarynan kolledjge túsken jastar jalpy bilim ala almaıdy. Al Qazaqstan Respýblıkasynyń 30-baby, 1-tarmaǵy boıynsha tegin orta bilimge kepildik berilgen. El azamattary ony mindetti túrde alýy qajet. «Bilim týraly» zańda da orta bilim jalpy bilimniń bir satysy retinde belgilengen. Osylaısha, mınıstrliktiń qazirgi josparlary konstıtýtsııalyq normalarǵa da, zańǵa da qaıshy. Ondaıda azamattardyń orta bilim alýǵa qatysty quqyqtary shekteledi», - dedi B.Mamraev búgingi plenarlyq otyrysta.
Onyń sózine qaraǵanda, aǵymdaǵy jyly 9 qańtarda mınıstrlik arnaıy jospardy qabyldady. Onda óndiristik oqytýmen aınalysatyn ustazdar men mamandardy basqa jumysqa ornalastyrý máselesi qarastyrylǵan.
«Orta bilim pánderin alyp tastap, onyń ornyna praktıkanyń ýaqytyn uzartýǵa jumys berýshiler de daıyn emes. Osynyń saldarynan jastar arasynda kásiptik-tehnıkalyq bilimge degen suranys tómendep ketýi múmkin», - dep atap kórsetti B.Mamraev.
Aıta keteıik, plenarlyq otyrysta «Aqjol» fraktsııasy da óz depýtattyq saýalyn joldady. QR Parlament Májilisiniń depýtaty Keńes Absatırovtyń aıtýynsha, ótken jyly «Kúndelik» aqparattyq júıesi aqparattyq qaýipsizdik talaptarynan óte almady. Soǵan qaramastan, memlekettik-jekeshelik áriptestik týraly kelisimshartqa qol qoıyldy.
«Kúndelik» JShS dırektory Aleksandr Grıgorıan da, mınıstr de atalǵan júıeni qoldanǵany úshin aqy alynbaıtynyn talaı ret aıtqan. Bul degenimiz, elektrondy sabaq kestesi, elektrondy jýrnal, kúndelik, mekteptiń ishki jelisi, balanyń sabaq úlgerimi týraly esep, ádistemelik materıaldar, úı jumystary, muǵalimder men ata-analar arasyndaǵy habar almasý - bári-bári tegin bolýy shart. Ony kompıýter, gadjet pen smartofonǵa júkteý mindeti de bolmaýy qajet», - deıdi K.Absatırov.
